QR Ádilet ministri Marat Beketaev Stati isine qatysty pikir bildirdi, dep habarlaidy QazAqparat.
«Ádilet ministrligi biznesmen Statimen aradaǵy teketireste Qazaqstannyń jeńiske jetkenin málimdedi. Sonda da halyq kókeiinde suraq bar. Qazaqstan Stati talap etip otyrǵan 500 mln dollardan astam qarajatty tólei me?», - dep surady BAQ ókili.
«Munyń jaýaby qarapaiym. Qazaqstan Stati talap etip otyrǵan aqshany tólemeidi», - dep qysqa qaiyrdy vedomstvo basshysy ortalyq kommýnikatsiialar qyzmetinde ótken brifingide.
Sondai-aq, ol Qazaqstan tarabynyń Statiden sot shyǵyndary úshin qansha qarajat talap ete alatyny týraly túsinikteme berdi.
«Bul shyǵyndardy túrli jolmen esepteýge bolady. Zańgerlerge jumsalǵan tikelei shyǵyndy birinshi blokqa jatqyzýǵa bolady. Ekinshi blok – repýtatsiialyq shyǵyndar. Úshinshisi – QR Ulttyq banki osy is boiynsha buǵattalǵan qorlardyń shotynan shekteý qoiylǵan kezde igerilmegen yqtimal tabystardy talap ete alady», - dedi Marat Beketaev.
Onyń aitýynsha, Stati isine ketken shyǵyndy tolyq qaitarýdan da mańyzdy másele bar.
«Bul jerde shyǵyn somasyn maksimaldy mólsherde qaitarý eń mańyzdy mindet emes deýge bolady. Statidiń ózi Moldoviiada turatyny málim. Onyń negizgi shottary basqa da sot protsesteri boiynsha buǵattalǵan. Onymen istes bolǵan kreditorlar óte kóp. Onyń qylmystyq áreketi bir jyl ǵana júrip jatqan joq. Statige qarsy is júrgizip jatqan Qazaqstan ǵana emes. Keleshekke úńilsek, tolyq somany óndirip alý múmkin bolmaityn da shyǵar. Bul jerde Qazaqstannyń osyndai alaiaqtardy anyqtaýǵa, osyndai agressivti áreketterge qarsy turýǵa qajetti resýrstary bar ekenin dáleldeý mańyzdy», - dedi ol ortalyq kommýnikatsiialar qyzmetinde ótken brifingide.
Aitýynsha, osyndai isterdegi tabandylyǵy arqyly Qazaqstan ózgelerge mańyzdy signal berip otyr.
«Halyqaralyq qorlar men investitsiia naryǵynyń negizgi oiynshylary osy signal arqyly Qazaqstannyń quqyqtyq júie retinde damyp kele jatqanyn túsinetin bolady. Tiisinshe, Qazaqstanǵa investitsiia salýǵa bolady jáne salý qajet ekenine kóz jetkizedi», - dedi Ádilet ministri.
