Parlament Májilisiniń jalpy otyrysynda Qazaqstan Resýpýblikasynyń Ákimshilik rásimdik-protsestik kodeksiniń jobasy birinshi oqylymda maquldandy, dep habarlaidy QazAqparat.
«Ózderińizge málim ulttyq zańnamany jetildire otyryp, azamattardyń konstitýtsiialyq quqyqtary men bostandyqtaryn naqtyly qamtamasyz etý baǵytynda birshama jumystar atqaryldy. Alaida sheshimin tabýdy qajet etetin problemalar bar. Solardyń biri – jariialyq, quqyqtyq daýlardy sheshý máselesi. Atap aitqanda, qazirgi ýaqytta, jariia-quqyqtyq daýlarda, azamatqa qarsy memlekettik apparat bolǵan kezde taraptardyń teńsizdigi oryn alady jáne azamattardyń múmkindikteri memlekettik apparat resýrstarymen sáikes kelmeidi. Bul týraly Memleket basshysy Qazaqstan halqyna Joldaýynda atap ótti. Osyǵan qarai, Prezident ákimshilik ádilet qurylymyn engizý qajettigin belgiledi. Osy mindetterdi sheshý úshin Ádilet ministrligi Joǵarǵy Sotpen birlesip, Ákimshilik rásimdik-protsestik kodeksiniń jobasyn ázirledi», - dep toqtaldy Ádilet ministri Marat Beketaev.
Kodekstiń jobasy birneshe maqsatty kózdeidi.
Birinshiden, azamattarǵa basqarýshylyq sheshimderdi qabyldaý protsesine belsendi qatysýǵa múmkindik beretin kepildikter jiyntyǵyn bekitý eskerilgen. Ekinshiden, joǵary turǵan organ men sotta bilik organdary daýlardy qaraý kezinde azamattardyń quqyqtaryn qorǵaýdyń tiimdi tetikterin belgileý qarastyrylǵan.
Osyǵan orai, Kodeks jobasy eki negizgi bólikten turady. Ol – ákimshilik rásimder jáne ákimshilik sot isin júrgizý.
Ákimshilik rásimderdi retteý bóliginde jobada tiisti negizgi erejeler qamtylǵan.
«Bilik ókilettigin tek memlekettik organdar ǵana emes, ózge de tulǵalar júzege asyratynyn eskere otyryp, «ákimshilik organ» uǵymyn bekitý usynylady. Bul ne úshin qajet? Eger memlekettik emes sýbekti azamattardyń quqyqtaryn iske asyrýǵa baǵyttalǵan sheshimder qabyldaýǵa ýákiletti bolsa, onda ol Kodekstiń jobasynda belgilengen kepildikterdi saqtaýǵa mindetti bolady. Iaǵni, Kodekstiń erejeleri eger ol azamattardyń quqyqtaryn iske asyrýmen bailanysty bolsa, memlekettik jáne memlekettik emes sýbektilerdiń kez kelgen qyzmetine qoldanylatyn bolady», - dedi ministr.
Onyń sózine qaraǵanda, bilik organdarynyń basqarý sheshimderin qabyldaý kezinde azamattarmen «keri bailanysty» qamtamasyz etetin rásimdik kepildikter bekitiledi. Negizgi ereje ol - bilik sýbektisi túpkilikti sheshim qabyldaý aldynda múddeli azamattyń pikirin tyńdaýǵa mindetti bolady.
«Kodekstiń jobasynda mindetti túrde daýlardyń sotqa deiingi shaǵymdaný institýty engiziledi. Alaida bul salyq jáne keden daýlaryna taralmaidy. Shaǵymdy qaraý boiynsha is júrgizý jedeldetilgen tártippen, 15 kúnge deiin ótedi. Atalǵan institýt azamattardyń suraqtaryn tez sheshýge, ýaqytty únemdeýge jáne sot shyǵystaryn azaitýǵa múmkindik beredi», - dedi Marat Beketaev.
