Qazaqstan Respýblikasynyń Ulttyq kitaphanasynda Atyraý oblysy ákimdiginiń jáne «Rahymjan Otarbaev rýhaniiat qory» jeke qory jáne Atyraý oblysynyń ákimdiginiń uiymdastyrýymen kórnekti qalamger, dramatýrg, Qazaqstannyń eńbek sińirgen qairatkeri, halyqaralyq Sh.Aitmatov syilyǵynyń laýreaty, «Parasat» ordeniniń iegeri Rahymjan Otarbaevtyń úsh tilde jaryq kórgen biobibliografiialyq kórsetkishiniń tusaýy kesildi, - dep habarlaidy «Ult aqparat».
Rahymjan Otarbaevtyń týǵanyna 65 jyl tolý mereitoiyna arnalǵan bul tusaýkeser Táýelsizdigimizdiń 30 jyldyq merekesi qarsańynda arnaiy uiymdastyrylyp otyr.
QR Ulttyq kitaphanasynyń direktory Baqytjamal Ospanova áriptesin erekshe eske aldy.
«Ulttyq akademiialyq kitaphanany biraz jyldar basqaryp, elimizdiń kitaphana salasynyń damýyna óz úlesin qosqan azamat, bilikti basshy retinde kitaphananyń joǵary deńgeide, zamanǵa sai, oqyrmandarǵa kitap oqýǵa qyzyǵýshylyǵyn arttyrýǵa, kitap mádenietin kóterýge yqpal etetin azamat edi» dedi Baqytjamal Ospanova.
Osy oraida jazýshynyń jary Sáýle Otarbaeva joldasynyń kitaphanashylarmen qarym-qatynasy týraly áńgimelep, barsha qaýymǵa alǵysyn bildirdi.
«Biz úshin búgin óte erekshe kún. Aldymen eldiń atynan, oblys basshylyǵy atynan, otbasymyzdyń atynan barshańyzǵa erekshe raqmet aitqymyz keledi. Rahymjannyń qandai tulǵa bolǵanyn, qandai jazýshy bolǵanyn el biledi. Aldymen ol adam retinde tanyldy. Ózi qandai ashyq adam bolsa, jazýy da sondai, jazyp, shashyp tastap júre beretin. Maǵan sendi ma, bala-shaǵasyna sendi ma... Osy olqylyqtyń ornyn toltyraiyq, izdegen oqyrmany óte kóp, jinaq etip qurastyraiyq dedik. Ár ǵalymnyń, ár jazýshynyń, ár qalam iesiniń murasy osylai biobibliografiia retinde qalýy kerek dep oiladyq. Ol kitaphanada basshy bolyp otyrǵan kezinde, Beineti kóp, zeineti az, elge kórinbeitin kitaphanashylarǵa úlken qamqorlyqpen, qolynan kelgenshe kómektesip, árqaisynyń ishki problemasyn, otbasylyq jaǵdailaryn túsinip, jumys isteýge tyrysqan azamat edi. Sol nietti, sol kóńildi búgin bizdiń aldymyzdan shyǵyp jatyr, sol úshin sheksiz alǵysymdy bildiremin» dedi Sáýle Otarbaeva.
Jalpy kez kelgen jazýshynyń, ǵalymnyń eńbekterin biobibliografiialyq kórsetkishin qurastyrý ońai emes ekenin tilge tiek etken qalamger Qali Sársenbai Rahymjan Otarbaevtyń erekshe talantyn aita kele, qurastyrýshylarǵa rizashylyǵyn bildirdi.
«Qazaqtyń qara sózin qoisha órgizedi» degendei, sondai qoisha órgizip, qazaqtyń qara sózinen daýyl turǵyzǵan azamat qoi Rahań. Qudai sana berdi, qolǵa qalam berdi, sózge boiaý berdi. Ózi aitqandai, Rahańa Táńiri sheksiz talant berdi. Sol talantyn ómiriniń sońǵy kúnine deiin múmkindiginshe tókpei-shashpai paidalandy. Elge qyzmet etti. Jazýshynyń eńbekterin jinaý ońai sharýa emes. Inemen qudyq qazǵandai, Rahańnyń shyǵarmashylyq bastaǵannan bastap ár jyldardaǵy eńbekterin qurastyrý, izdeý, tabý degen ońai jumys emes, qajyrly eńbekti talap etedi» dedi «Ana tili» gazetiniń bas redaktory Qali Sársenbai.
Aita keteiik, atalǵan sharaǵa qalamger R.Otarbaevtyń zamandastary, shákirtteri, jazýshylar, ǵalymdar, qoǵam qairatkerleri, sonymen qatar BAQ ókilderi qatysty.
Aqparatqa qosymsha:
Rahymjan Otarbaev «Qazaq ádebieti», «Jalyn», «Egemen Qazaqstan», «Aq Jaiyq» basylymdarynda, Televiziia jáne radiohabarlar taratý jónindegi memlekettik komitetinde, Qazaqstannyń Qyrǵyzstan Respýblikasyndaǵy elshiliginde, Mahambet atyndaǵy Atyraý oblystyq qazaq drama teatrynda jaýapty qyzmetter atqarǵan. «Qupiia tún», «Jáńgir Han», «Juldyzdar qulaǵan jer», «Jaiyq jyry», «Soǵystyń sońǵy bombasy», «Sher», «Qarasha qazdar qaitqanda», «Aspandaǵy aq kóbelekter», «Bizdiń aýyldyń amazonkalary», «Aina-ǵumyr», «Shyńǵys hannyń kóz jasy», «Qyz Danaidyń qyrǵyny», «Bas» jáne t.b. kitaptardyń avtory. Shyǵarmalary orys, túrik, aǵylshyn, ispan, arab, qytai, t.b. tilderge aýdarylyp basylǵan. «Ábýtálip ápendi», «Abai-sot», «Men Sizdi satqan joqpyn», «Ǵabit», «Án-Ámire», «Jasyn ǵumyr», «Jáńgir han», «Bas», «Syrym batyr», «Mustafa Shoqai», «Mahabbat munarasy», «Aina-ǵumyr», «Fariza men Muqaǵali», «Nashaqor jaily novella», «Aktrisa», «Narkom Júrgenov» t.b. pesalary elimizdiń jáne shetel teatrlarynda udaiy qoiylyp keledi. «Muhammed Salyq Babajanovtyń ómiri men ólimi», «Isatai Taimanov, «Azýsary men Kirpishbai», «Jáńgir han», «Jumbaqtaýdaǵy qazyna», t.b. kinostsenariiler jazǵan. Qalamgerdiń shyǵarmashylyq murasynyń tolyq tizimi usynylǵan bibliografiialyq kórsetkishte qazirgi zaman ádebietin zertteýshiler men Rahymjantanýshylarǵa arnalǵan ǵylymi negizdi maǵlumat mol. Aita keteiik, Rahymjan Otarbaevtyń murasyn saqtaý, taratý, jarnamalaý, shyǵarý maqsatynda 2019 jyly «Rahymjan Otarbaev rýhaniiat qory» quryldy. Direktory Otarbaeva Sáýle.
