Tól ádebietimizdiń asqar shyńǵa shyǵýy - uly oishyl Abaidyń danalyq bolmysymen tyǵyz bailanysty. Bul týraly búgin elordada ótip jatqan Aziia elderi qalamgerleriniń tuńǵysh forýmynda Qazaqstan Prezidenti Qasym-Jomart Toqaev aitty, dep habarlaidy QazAqparat.
«Qurmetti qalamgerler, jazýshylar! Qurmetti qaýym! Eń aldymen barshańyzdy osy forýmǵa kelgenderińizge, qatysqandaryńyzǵa rizashylyǵymdy bildiremin. Aziia aqyn-jazýshylarynyń alǵashqy forýmy Qazaqstannyń Tuńǵysh Prezidenti – Elbasy Nursultan Nazarbaevtyń bastamasymen ótkizilýde. Bizdiń halqymyz rýhani muralaryn saqtap, ulttyq tarihyn zertteýge, mádenietin jan-jaqty qoldaýǵa árdaiym basa mán beredi», - dedi forým jumysyn ashqan Qazaqstan Prezidenti.
Memleket basshysy bul berik ustanym Táýelsiz Qazaqstan kezeńinde jańa sipat alyp otyrǵanyn basa aitty.
«Qazaq ádebieti - halqymyzdyń san ǵasyrlyq tarihymen bite qainasqan asyl qazyna. Tutas túrkiniń ortaq muralary Kúltegin, Tonykók, Bilge qaǵan jyrlary men Qorqyt ata kitaby - ádebietimizdiń túp tamyry. Ál-Farabi, Qoja Ahmet Iasaýi syndy uly tulǵalardyń eńbekteri islam dáýirinde túrki jurtyn búkil dúniege tanytty. Altyn orda zamanyndaǵy jyraýlyq poeziia dástúri óz jalǵasyn taýyp keledi. Tól ádebietimizdiń asqar shyńǵa shyǵýy uly oishyl Abaidyń danalyq bolmysymen tyǵyz bailanysty. Onyń shyǵarmalary - jalpy adamzatqa ortaq rýhani jaýharlar», - dedi Qasym-Jomart Toqaev.
Sondai-aq, Memleket basshysy Qazaqstannyń 61 qalamgeriniń týyndylary Birikken Ulttar Uiymynyń 6 tilinde jaryq kóretinin aitty.
«Búginde tól ádebietimizdiń kókjiegi keńeiip, álem ádebietiniń damý kóshine qosyldy. Qazaq qalamgerleriniń týyndylary arqyly dúniejúzi jurtshylyǵy ulttyq rýhaniiatymyzdy tanyp-bilýde. Qazaqstandyq 30 jazýshy men 31 aqynnyń shyǵarmalary BUU-nyń 6 tiline aýdarylyp, jaryqqa shyqqaly otyr. Osy týyndylar 5 qurlyqtaǵy 90-nan astam elge, iaǵni, 2,5 mlrd oqyrmanǵa taraidy», - dedi Q.Toqaev.
Qazaqstan Prezidentiniń atap ótýinshe, bul qazaq ádebieti tarihynda buryn-sońdy bolyp kórmegen biregei oqiǵa bolmaq.
