«Ádebiet portalynyń» 25 ereksheligi

Qazaqstan Táýelsizdiginiń 25 jyldyǵyna orai!

Búgin kókirek kózi oiaý kópshilik qaýymnyń kózaiymyna ainalǵan «Ádebiet portaly» 3 jasqa tolyp otyr! Onyń tusaýyn osydan týra úsh jyl buryn qazirgi qazaq ádebietiniń bir top aýzy dýaly aqsaqaldary men qarymdy qalamgerleri kesip, batasyn bergen bolatyn.

Osy kúnge deiin «Ádebiet portalyna» tórt tilde 4 myńǵa jýyq elektrondy kitap júktelip, 4 myńnan astam avtordyń jeke paraqshasy ashylǵan. Jáne de 300-ge tarta kitaptardyń qysqasha mazmuny, 800-den astam ádebiet taqyrybyndaǵy aýdio-video jazbalar ornalastyrylǵan.  Qazirgi kúni myń jarymnan astam bloger tirkelip, ózderiniń jeke blogyn júrgizip otyr. Sonymen qatar, portal ádebiet áleminde kúndelikti bolyp jatqan jańalyqtardy úzdiksiz jariialap, aqyn-jazýshylarmen turaqty suhbat júrgizip, olardyń siiasy keppegen shyǵarmalaryn der kezinde oqyrmanǵa usynyp kele jatyr.

Keshe ǵana Qazaqstan Respýblikasynyń Táýelsizdigine 25 jyl tolǵanyn eskere kele, «Ádebiet portalynyń»  25 ereksheligin nazarlaryńyzǵa usynamyz:

1. «Ádebiet portaly» - Qazaq eliniń ádebi murasyna qyzyǵýshylyq tanytqan kez-kelgen kózi ashyq, kókiregi oiaý oqyrmannyń basyn biriktiretin, sol ádebi murany zańdy túrde bir jerge jinaqtaityn ádebi platforma;
2. 100 paiyz memleket qoldaýymen ashylǵan jáne Úkimettiń qamqorlyǵymen qyzmet atqaryp otyrǵan joba;
3. Portal 4 tilde, iaǵni qazaqsha, oryssha, túrikshe jáne aǵylshynsha qyzmet etedi;
4. «Ádebiet portalynyń» elektrondy bazasynda 4 myńǵa jýyq kitap qory jinaqtalǵan;
5. Portalda 4 myńnan astam avtordyń jeke paraqshalary bar, olarǵa sol avtordyń kitaptary, maqalalary men suhbattary, sondai-aq, sol qalamger týraly jazylǵan barlyq materialdar toptastyrylǵan;
6. «Ádebiet portalynda» «Ádebi aýdarma» atty arnaiy joba júrgizilip otyrady. Onda Úkimet tarapynan qazaq ádebietindegi úzdik shyǵarmalar birqatar shet tilderine, sondai-aq álem ádebietiniń jaýharlary qazaq tiline aýdarylyp otyrady;  
7. Portaldyń taǵy bir arnaiy jobasy – «Illiýstratsiia» dep atalady. Munda qylqalam sheberleriniń ádebi shyǵarmalarǵa negizdep salǵan týyndylary toptastyrylady;
8. Epistoliarlyq janrdaǵy «Hat» arnaiy jobasy arqyly portalǵa tarihi tulǵalardyń bir-birine jazysqan qundy hattary iriktelip alynyp, oqyrman nazaryna usynylady;
9. «Aýdiokitaptar» jobasynda qazaq halyq ertegileriniń, batyrlar jyrlary men jyraýlar poeziiasynyń, qazirgi zaman ádebietindegi klassikalyq týyndylardyń aýdionusqalary shoǵyrlandyrylǵan. Kez kelgen oqyrman olardy onlain túrde tyńdap, basqalarmen bólise alady;
10.  Portaldy barynsha qoljetimdi qylý maqsatynda «Ashyq minber» atty ádebi blok ashý múmkindigi qarastyrylǵan. Onda kez kelgen oqyrman portalǵa tirkelý arqyly óz blogyn ashyp, túrli jazbalaryn, basqa aqyn-jazýshylardyń shyǵarmalaryn ornalastyryp nemese ortaq talqylaýǵa usyna alady;
11.  «Beinepoeziia» jobasynda tanymal aqyndar men jas aqyndardyń óz óleńderin oqyǵan videosy turaqty túrde jariialanyp otyrady. Bul óz kezeginde jalpy oqyrmannyń poeziiaǵa degen qyzyǵýshylyǵyn oiatyp, óleńge degen talǵamyn joǵarylatýǵa septigin tigizedi;
12.  «Balalar ádebieti» bóliminde maqal-mátelder men jumbaq-jańyltpashtardan bastap álemdik klassikadaǵy balalarǵa arnalǵan shyǵarmalardyń mol elektrondy qory bar;
13.  Portaldyń jumys jasaǵan 3 jylǵy nátijesi – tanymal tulǵalardan alynǵan 50-den astam suhbat jinaqtalyp tur. Ony oqyrmannyń kez kelgen ýaqytta oqýǵa múmkindigi bar;
14.  «Ádebiet portalynda» turaqty túrde túrli ádebi konkýrstar uiymdastyrylyp turady. Osyndai konkýrstardyń arqasynda ádebi ortaǵa jańa esimder belgili bolyp, ádebi kóshke jas talanttar qosylyp jatyr;
15.  «Keiipkerler» arnaiy jobasynda yqylym zamandardan belgili aýyz ádebieti keiipkerleri men qazirgi ádebi keiipkerler týraly naqty ári tolyq aqparattar alýǵa bolady;
16.  Portalda ár paidalanýshyǵa óz kitabyn nemese qolynda bar basqa avtordyń kitabyn júktep, kópshilikke usyný múmkindigi berilgen. Sonymen qatar, paidalanýshy ózi qalaǵan avtorǵa kýrator bolyp, sol avtordyń paraqshasyn tolyqtyrýǵa, kitaptaryn ornalastyryp, foto-videomaterialdaryn toptastyrýǵa quqyǵy bar;
17.  «Qysqasha mazmun» arnaiy jobasynda portal tutynýshylary ózi oqyǵan ádebi shyǵarmanyń qysqasha mazmunyn jazyp, ornalastyra alady. Ol qazirgi ýaqyttyń tapshy zamanynda kóptegen kitaptar týraly habar alyp, shyǵarmanyń ne jaiynda ekenin bilip júrýge taptyrmas joba;
18.  Portal jas aqyn-jazýshylarǵa aqparattyq qoldaý kórsetip, qazaq ádebietin internet keńistiginde júieli túrde nasihattaýǵa baryn salyp keledi; 
19.  Portal qurylǵan 3 jylda 20-ǵa jýyq belgili qalamgermen «Onlain konferentsiia» uiymdastyrdy. Oǵan oqyrmandar belsendi túrde qatysyp, ózderiniń súiikti aqyn-jazýshylaryna kókeide júrgen suraqtaryn qoiyp, tushymdy jaýaptaryn aldy;
20.  «Fotogalereiada» qazaq ádebieti klassikteriniń ómirinen syr shertetin tarihi sýretter toptastyrylǵan;
21.  Sonymen qatar, portal paidalanýshylary osy ýaqytqa deiin ádebi týyndylar jelisimen túsirilgen, tárbielik jáne estetikalyq máni zor kórkem filmderdi kórip, tamashalai alady;
22.  «Janrlar» bóliminde ádebiettegi barlyq janrlar toptastyrylyp, olardyń árqaisysyna jeke-jeke anyqtama berilgen. Bul qazaq tili men ádebieti kafedralarynda oqityn stýdentterge taptyrmas oqý quraly dep aitýǵa bolady;
23.  «Jyr jaýhary» jobasynda qazaq ádebietindegi klassik aqyndardyń óleńderin mánerlep oqýdan saiys uiymdastyrylady. Oǵan qatysýshy bir klassiktiń óleńin videoǵa nemese aýdioǵa jazyp, portalǵa joldai alady. Konkýrs qorytyndysy boiynsha úzdikterdi marapattaý sharasy uiymdastyrylady;
24.  «Portalda» álem ádebietiniń úzdik týyndylary da oqyrmanǵa jii usynylyp otyrady; 
25. «Ádebiet portaly» óz qyzmeti arqyly tanymdyq-teoriialyq, pedagogikalyq-aǵartýshylyq missiiany ustanady. Oqýshylar, stýdentter, oqytýshylar jáne jalpy qaýym ózine kerekti aqparatty osy portaldan taba alady.