Polshanyń Krakov qalasynda ótken ADCC týrnirinde qazaqstandyq balýan Bekzat Qapashov pen amerikalyq sportshylar arasynda janjal shyǵyp, arty jappai tóbeleske ulasty, dep habarlaidy ult.kz.
Qapashov amerikalyq Dorian Olivarespen beldesken. Onyń aitýynsha, jekpe-jek kezinde eki sportshy da emotsiiaǵa berilip, ereje buzylǵan. Keiin qarsylasy ony urǵan.
Alǵashqy kezdesýden soń sportshylar qaita beldesken. Ekinshi jekpe-jekte Olivares jeńiske jetken. Alaida keiin amerikalyq sportshynyń ákesi men qazaqstandyq tarap arasynda janjal týyp, eki komanda tóbelesip qalǵan.
Oqiǵaǵa grepplingten álemniń bes dúrkin chempiony Gordon Raian da aralasqan. Janjal sáti túsirilgen video áleýmettik jelide keń tarady.
Qapashovtyń sózinshe, uiymdastyrýshylar eki tarapty da bir jylǵa diskvalifikatsiialaǵan.
Al Qazaqstannyń Greppling qaýymdastyǵy Krakovtaǵy týrnirdiń resmi kúntizbege kirmeitinin jáne ulttyq qurama sportshylaryn bul jarysqa jibermegenin málimdedi. Qapashov týrnirge memlekettik qoldaýsyz qatysqan.
