Qazaqstan aýmaǵynan adamnyń aǵzalary men tinderi tek qana QR azamattaryna meditsinalyq kómek kórsetý úshin shyǵarylady. Bul týraly QR Parlamenti Senatynyń jalpy otyrysynda QR Densaýlyq saqtaý ministri Eljan Birtanov aitty, dep habarlaidy QazAqparat.
«Kodekstiń jobasyn talqylaý barysynda Parlament Májilisiniń jumysy aiasynda jurtshylyqtyń pikirin eskere otyryp, kei daýly normalar pysyqtaldy. Olar boiynsha konsensýs tabyldy. Kodeks jobasynda Qazaqstan aýmaǵynan adamnyń aǵzasy men tinderi tek qana QR azamattaryna meditsinalyq kómek kórsetý úshin shyǵarylatyn boldy», - dedi «Halyq densaýlyǵy jáne densaýlyq saqtaý júiesi týraly» kodeks pen «Keibir zańnamalyq aktilerge densaýlyq saqtaý máseleleri boiynsha túzetý engizý jóninde» ilespe zań jobasyn tanystyrǵan ministr.
Onyń atap ótýinshe, qaitys bolǵan adamnyń organdaryn alýǵa kelisim prezýmptsiiasyna qatysty norma Qazaqstan Respýblikasynda 2009 jyldan bastap qoldanysta.
«Erikti túrde kelisim berýdi tirkeý nemese kelisimdi keri qaitaryp alý meditsinalyq uiymdar kórsetetin memlekettik qyzmet bolyp sanalady. Kodeks jobasynda adamnyń tiri kezinde aǵzasyn alý boiynsha erik bildirmegen jaǵdaida kelisimdi bermeýge jubaiynyń, al ol bolmaǵan jaǵdaida jaqyn týystarynyń biriniń quqyǵy bar ekeni kózdelgen», - dedi Eljan Birtanov.
