Almatyda turǵyndardy 185 mln astam teńgege aldap soqqan adam sottaldy, dep habarlaidy "Ult aqparat".
Almaty qalalyq Politsiia departamentiniń málimetine sáikes, 2019 jyldyń tamyz aiynda Dilfýza Aldabergenovanyń ústinen 64 adamnan aryz tústi. Olar jalpy somasy 185 million 802 myń 400 teńgeni quraityn materialdyq zalal keltirilgendigi týraly ujymdyq málimdeme jasaǵan.
Bul fakt Bostandyq aýdandyq politsiia basqarmasynyń sotqa deiingi tergep-tekserýdiń biryńǵai tiziliminde QR QK-niń 190 baby, 3 bóligi, 1,4 tarmaǵy boiynsha tirkelgen.
«Sotqa deiingi tergeý barysynda anyqtalǵany, 2018 jyldyń maýsym aiynan bastap 2019 jyldyń qyrkúiek aiyna deiin azamatsha Aldabergenova áleýmettik jeliler arqyly investitsiialyq jobanyń ashylatyndyǵyn jariialady. Jobanyń máni býkmekerlik keńselerge, sondai-aq, ár túrli biznes-jobalarǵa aqsha salý arqyly qarajatty kóbeitý boldy.
Osylaisha, salymshylar 30% jáne 50% paida tabý úshin banktik kartalar arqyly uiymdastyrýshyǵa jáne basqa adamdarǵa qarajat aýdardy, biraq keiinnen eshqandai paida tappady. Aldabergenova salynǵan qarajatty qaitarǵan joq. Tergeý barysynda kúdikti ustalyp, sot sheshimimen qamaýǵa alyndy», - dedi, Almaty qalalyq Politsiia departamenti bastyǵynyń orynbasary Rústem Ábdrahmanov.
Tergeý Dilfýza Aldabergenovanyń kinásin dáleldedi. Qylmystyq is boiynsha is júrgizý kýálandyrylyp, olardyń materialdary sotqa jiberildi.
Almaly aýdandyq sotynyń sýdiasy D.A. Aldabergenovaǵa qatysty QR QK-niń 190 baby, 4 bóligi, 2 tarmaǵy jáne QR QK-niń 217 baby, 3 bóligi, 2 tarmaǵy boiynsha 6,8 jylǵa bas bostandyǵynan aiyrý týraly úkim shyǵardy.
