Foto: Maqsat Shaǵyrbaev / Kazinform
Búgin Bas prokýratýra men Ishki ister ministrliginiń qyzmetkerleri Qazaqstan Respýblikasy Syrtqy ister ministrliginiń qoldaýymen tonaý, kisi óltirý jáne urlyq jasaǵany úshin qylmystyq jaýapkershilikke tartý maqsatynda Qazaqstan azamatyn Túrkiiadan ekstraditsiialady. Bul týraly Qazaqstannyń Bas prokýratýrasy málimdedi.
2022 jyldyń naýryz aiynda Almaty oblysynda kúdikti óziniń aǵasymen birlesip quny 300 million teńgeden astam temeki ónimderin tasymaldaityn júk kóliginiń júrgizýshisine qaraqshylyq shabýyl jasaǵan. Júrgizýshini óltirip, máiitti jol boiyndaǵy shuńqyrǵa kómgen.
«Qylmys jasaǵan kúdiktilerdiń biri ustalyp, nátijesinde sottaldy, al ekinshisi tergeýden qashyp úlgerdi, sondyqtan oǵan halyqaralyq izdeý jariialandy. 2023 jylǵy tamyzda ekinshi kúdikti Túrkiiada ustaldy. Qazir ol Astanadaǵy tergeý izoliatorynda qamaýda. Osy qylmystardy jasaǵany úshin múlki tárkilenip, on bes jyldan jiyrma jylǵa deiingi merzimge bas bostandyǵynan aiyrý nemese ómir boiyna bas bostandyǵynan aiyrý túrindegi jaza qarastyrylǵan», — delingen habarlamada.
