Foto: atameken.kz
«Atameken» ulttyq kásipkerler palatasynyń burynǵy basshysy Abylai Myrzahmetovtiń isi jabyq rejimde qaralady. Bul týraly sýdia Aijan Kúlbaeva málim etti, dep habarlaidy Kazinform.kz agenttigi.
«Memlekettik aiyptaýshy qylmystyq isti jabyq sot rejiminde qaraý jóninde ótinish berdi. Kýáger G. prokýrorǵa jeke basy men otbasy músheleriniń qaýipsizdigin ýaiymdaitynyn aityp, isti jabyq qaraýdy suraǵan. Aiyptaýdyń mán-jaiyn eskere otyryp, kýágerler men onyń otbasy músheleriniń qaýipsizdigin qamtamasyz etý maqsatynda sot memlekettik aiyptaýshynyń ótinishin qanaǵattandyrý jáne osy qylmystyq isti jabyq sot otyrysynda qaraý qajet dep sanaidy», — dedi sýdia.
Buǵan deiin habarlaǵanymyzdai, prokýror Baýyrjan Shekenov sotty jabyq ótkizýdi suraǵan edi. Ótinishte sotqa qatysatyn jábirlenýshilerdiń, kýágerlerdiń, olardyń otbasy músheleri men jaqyn týystarynyń qaýipsizdigin qamtamasyz etý qajettigi aitylǵan.
Eske sala keteiik, «Atameken» ulttyq kásipkerler palatasynyń burynǵy tóraǵasy Abylai Myrzahmetov ótken jyly 10 mamyrda ustalǵan.
Antikor taratqan aqparatqa sáikes, ol alaiaqtyq jáne kásipkerdi týysyn qylmystyq jaýapkershilikten bosatýǵa járdemdeskeni úshin asa iri kólemde para berýge itermeledi degen kúdikke ilingen.
«Atameken» UKP eks-basshysyna qatysty is byltyr 21 jeltoqsanda sotqa jetti.
