«Atameken» UKP basqarma tóraǵasy Abylai Myrzahmetov tótenshe jaǵdaidyń engizilýine bailanysty kásipkerler betpe-bet kelgen basty qiyndyqtardy atady, dep habarlaidy QazAqparat tilshisi.
«Kásipkerlerdiń 30 paiyzy ózderiniń nesie qaryzyn qaitarý ýaqytyn sozyp berýdi surap otyr. 25 paiyzy salyq turǵysynda jeńildik berýdi ótinedi. Tótenshe jaǵdai kezinde qazir halyqtyń suranysy da tómendep ketti. Saýda ortalyqtary men tamaqtandyrý oryndarynda da qysqartý jumystary kúsheiýde. Osynyń saldarynan kásipkerlerdiń 17 paiyzy óz shtatyn qysqartý máselesin kóterip otyr. Osy máseleni Eńbek jáne halyqty áleýmettik qorǵaý ministrligimen talqylaýǵa daiynbyz», - dedi Abylai Myrzahmetov Úkimet otyrysynda.
Onyń aitýynsha shaǵymdardyń kóbi týrizm salasynan túsken. Jyl basynan beri bul sala aitarlyqtai qiyndyqty bastan ótkerip keledi.
«Barlyq kásipker tótenshe jaǵdaidy keiingi aptada ǵana sezinip jatqanymen, olar aldyńǵy toqsannan beri kúrdeli jaǵdaida. Qazaqstanda týrizm salasynda 80 myńǵa tarta adam qyzmet etedi. 6 myńǵa jýyq kásiporyn bar. Sondyqtan osy salaǵa qandai kómek kórsetetinimizdi qarasaq degen ótinish bar», - degen ol Úkimetpen osy máseleni talqylaýǵa daiyn ekenin jetkizdi.
Abylai Myrzahmetov qazirgi tańda kásiporyndardy barynsha saqtap qalý kerektigin jetkizdi.
Eske sala ketsek búgingi Úkimet otyrysynda Úkimet otyrysynda Qarjy naryǵyn retteý jáne damytý agenttiginiń tóraǵasy Madina Ábilqasymova bankter men mikroqarjy uiymdary qarjylyq jaǵdaiy nasharlaǵan kásipkerler úshin qaryz tólemin 90 kúnge deiin shegerýi kerektigin aitqan edi.
Al Premer-Ministri Asqar Mamin tótenshe jaǵdai kezinde tólemin keshiktirgen qaryz alýshylarǵa aiyppul eseptelmeitinin málimdedi.
