«Astana» radiosynyń tikelei efirinde suhbat bergen qalalyq Jumyspen qamtý, eńbek jáne áleýmettik qorǵaý basqarmasynyń basshysy Ermek Ospanov Ábý-Dabi Plaza keshenindegi sheteldik qurylysshylardyń jalaqysy týraly pikir bildirdi, dep habarlaidy QazAqparat «Elorda Info» portalyna silteme jasap.
Efir barysynda radiotyńdarmandardyń biri: «Ábý-Dabi Plazadaǵy sheteldik qurylysshylar qazaqstandyqtarǵa qaraǵanda shynymen de kóp jalaqy ala ma?» degen saýal joldady.
«Ábý-Dabi Plazadaǵy janjaldan keiin komissiia jumys istedi. Turmystyq jaǵdailaryn, syiaqylardy, ústeme aqylardy tekserdik. Biz sheteldik jumysshylarmen de, qazaqstandyqtarmen de sóilestik. Shtattaǵy qyzmetkerlerdiń jalaqysyn tekserdik. Sheteldik jumysshylardyń jalaqysy, bizdiń azamattarǵa qaraǵanda tómen dep aita alamyn. Ábý-Dabi Plazadaǵy sheteldik jumysshylardyń kelisimshartta kórsetilgen ortasha jalaqysy 300 AQSh dollaryn quraityn bolsa, dál sondai qyzmettegi bizdiń azamattardyń jalaqysy 120 myń teńgeden bastalady. Atqarylǵan jumys kólemine qarai tólenetin jalaqy odan joǵary», - dep jaýap berdi Ermek Ospanov.
Basqarma basshysy, sondai-aq keshen qurylysyna Qazaqstan azamattary ǵana jumys isteitin 120 qosalqy merdiger kompaniia jumyldyrylǵanyn tilge tiek etti.
Eske salaiyq, aǵymdaǵy jyldyń 2 qyrkúiegi kúni Astanada salynyp jatqan «Ábý-Dabi Plaza» nysany aýmaǵynda qazaqstandyq jáne sheteldik jumysshylar arasynda daý-janjal týyndady. Politsiia bólimshesine jetkizilgen 41 adamnyń 8-i ákimshilik jaýapkershilikke tartyldy. Qalǵandary túsindirý jumystary júrgizilip, qoǵamdyq tártipti buzýǵa jol bermeý týraly eskertýden keiin bosatyldy. Astana qalalyq IID qurylys aýmaǵyndaǵy tártipsizdikke qatysty qylmystyq is qozǵady.
Keiin málim bolǵandai, 60 úndi jumysshysy eline qaitaryldy.
