Qazaqstannyń Birikken Arab Ámirlikterindegi Elshisi Madiiar Meńilbekov BAÁ Premer-Ministriniń orynbasary, Prezident isteri jónindegi ministri sheih Mansýr ben Zaid Ál Nahaianmen kezdesti, dep habarlaidy "Ult aqparat".
«Kezdesý barysynda aldaǵy ýaqytqa josparlanǵan is-sharalar men joǵary deńgeidegi saparlarǵa qatysty máseleler talqylandy. Onyń ishinde Ábý-Dabide qyrkúiek aiynda ótetin Úkimetaralyq komissiianyń kezekti otyrysyn ótkizýdiń, sondai-aq áriptestikti odan ári arttyrý joldaryn izdestirýdiń mańyzdylyǵy atap ótildi. Elshi qazaqstandyq taraptyń investitsiialar salasynda ózara qol jetkizilgen ýaǵdalastyqtardy iske asyrýǵa qoldaý kórsetýge daiyn ekendigin qaita rastady. Osy rette, Atyraý oblysyndaǵy polietilen óndirý kesheni jobasynyń qazirgi jaǵdaiy talqylandy. Sondai-aq, Nur-Sultan qalasyndaǵy «Ábý-Dabi Plaza» kesheniniń Elorda kúnin toilaý qarsańynda resmi ashylyp, qoldanysqa berilýi eki el úshin aýqymdy tarihi oqiǵalardyń biri bolatyny aityldy», - delingen QR Syrtqy ister ministrliginiń aqparatynda.
Sonymen qatar, taraptar mádeni-gýmanitarlyq jáne bilim salasyndaǵy yntymaqtastyqtyń qarqyndy damýyn atap ótken.
Osyǵan orai, qazaqstandyq Elshi biyl Nur-Sultan qalasyndaǵy №84 mektep-litseiinde sheih Fatima bint Mýbarak atyndaǵy arab tilin oqytý ortalyǵynyń ashylǵanyna jáne Qazaqstannyń úzdik oqýshylaryna Ámirlikter joǵary oqý oryndaryna grant bólgeni úshin alǵysyn bildirdi.
