Astananyń Esil aýdandyq sotynyń sheshimimen Ábliazovtyń qozǵalysy zańsyz jáne ekstremistik dep tanyldy, dep habarlaidy "Ult Aqparat".
«Bas prokrýratýramen «Qazaqstannyń demokratiialyq tańdaýy» atty tirkelmegen qozǵalystyń zańsyz qyzmeti anyqtaldy. Ony Qazaqstanda 20 jyl bas bostandyǵynan aiyrylýǵa sottalǵan Muhtar Ábilázov qurǵan. Ábilázovty sot qylmystyq qoǵamdastyqty qurǵany, 7,5 mlrd AQSh dollaryn urlap, shetelge shyǵarǵany úshin kináli dep tanyǵan. Qylmystyq tabystardy zańdastyrý faktileri boiynsha birqatar Eýropa elderinde Ábilázovqa qatysty tergeý júrgizilýde. Ulybritaniiada London qalasynyń Joǵarǵy sotynyń sheshimimen Ábilázov pen onyń sybailastarynan 4 mlrd AQSh dollary óndirilgen», - dedi QR Bas prokýratýrasynyń resmi ókili Oksana Loskýtova.
Málimdemege sáikes, shetelde sot jazasynan jasyrynyp, Ábilázov QR Konstitýtsiiasynyń talaptaryn buzyp, Konstitýtsiialyq qurylymdy kúshtep ózgertýdi nasihattaý men úgitteý boiynsha zańsyz áreketin jalǵastyrýda.
«Internet jeliler men mesendjerler, sondai-aq ár túrli áleýmettik toptarǵa paraqshalar taratý arqyly Ábilázov belsendi túrde Qazaqstandy qozǵalysqa qosylýǵa shaqyrady. Qazirgi biliktiń jaǵymsyz beinesin quryp, qoǵamda narazylyq kóńil-kúiler qalyptastyrýda. Osylaisha, josparly túrde áleýmettik arazdyq pen alaýyzdyqty qozdyrýda. Narazylyq aktsiialarynyń beibitshiligi týraly aitsa da, qozǵalys basshysy Muhtar Ábilázov pen onyń belsendileriniń qylmystyq maqsaty - bilikti qulatyp, basyp alý bolyp tabylady. Bul áreketter ekstremizmge qarsy is-qimyl týraly zań boiynsha saiasi ekstremizm bolyp sanalady jáne memlekettiń qaýipsizdigine qarsy qimyl retinde qýdalanady», - dedi ol.
Osyǵan bailanysty Bas prokýratýra «Prokýratýra týraly» zańmen kózdelgen ókilettikterin iske asyryp, sotqa qozǵalysty ekstremistik uiym dep taný týraly aryzben júgindi.
«Búgin Astana qalasynyń Esil aýdandyq sotynyń sheshimimen atalǵan aryz tolyq qanaǵattandyryldy. Sot pen qozǵalystyń áreketi ekstremistik dep tanylyp, oǵan Qazaqstan aýmaǵynda tyiym salyndy. Sonymen qatar, bul uiymnyń áreketterin aqparattyq materialdar, buqaralyq quraldary, telekommýnikatsiia, áleýmettik jeliler, mesendjerler jáne beinehostingter arqyly taratýǵa tyiym salynady. Budan basqa áleýmettik alaýyzdyqty qozdyrý, bilikti basyp alý týraly nasihattaý jáne oǵan jariialy túrde shaqyrý boiynsha Ulttyq qaýipsizdik jáne ishki ister organdary sotqa deiingi tergep-tekserý jumystaryn júrgizýde», - dedi málimdemeni oqyǵan Loskýtova.
«Qurmetti azamattar! Bas prokýratýra sot sheshimimen keiin «Qazaqstannyń demokratiialyq tańdaýy» ekstremistik uiymynyń áreketine qatysqany jáne qarjylandyrǵany úshin Qylmystyq kodekstiń 182, 258 jáne 405 baptaryna sáikes qylmystyq jaýapkershilik kózdelgen. Qatysý áreketine, qozǵalystyń ideiasyn nasihattaý, onyń jariialanymdaryn, paraqshalaryn, posttaryn jáne pikirlerin, basqa da aqparattyq materialdaryn daiyndaý, shyǵarý, kóbeitý jáne taratý jatady. Sonymen qatar, qatysý bolyp qozǵalysty jáne onyń basshysy Ábilázovty qoldaýǵa mitingterdi, sherýlerdi, jariia aktsiialaryn jáne basqa jappai is-sharalardy uiymdastyrý, ótkizý sanalady. Qarjylandyrý uǵymyna Ábilázovpen qozǵalysqa aqshany, ózge múlikti berý nemese jinaý, syiǵa tartý, aiyrbastaý, qaiyrymdyq jasaý, sponsorlyq jáne qaiyrymdylyq kómek, aqparattyq jáne ózge de qyzmetterdi kórsetý jatady. Sonymen qatar, istegi zańnamaǵa sáikes, ekstremistik toptyń áreketine qatysýdy óz erkimen toqtatqan adam qylmystyq jaýaptylyqtan bosatylady», - delingen málimdemede.
