Qazirgi kezde Abhaziia jáne Ońtústik Osetiia avtokólik quraldaryn satyp alý múmkindigine qatysty el halqy qyzyǵýshylyq bildirýde. Osy avtokólik quraldaryn satyp alyp, elimizdiń aýmaǵynda erkin júrý úshin zańdastyrýǵa bola ma? QR QM Memlekettik kirister komitetinde osy suraqqa jaýap berdi, dep habarlaidy "Ult aqparat".
«Atalǵan avtomashinalar Eýraziialyq ekonomikalyq odaqtyń (EAEO) kedendik aýmaǵyna Reseidiń ótkizý pýnktteri arqyly ýaqytsha ákelinedi, olar óz mártebesi boiynsha sheteldik taýarlar bolyp sanalady (iaǵni EAEO taýarlaryna jatpaidy) jáne kedendik baqylaýda bolady. Eger kólik quralynyń iesi Abhaziia, Ońtústik Osetiia zańdy tulǵasy bolsa - kólik quralynyń kedendik deklaratsiiasy (KQKD), al eger kólik quralynyń iesi osy aýmaqtardyń rezident jeke tulǵalary bolyp sanalsa - jolaýshylar kedendik deklaratsiiasy (JKD) ýaqytsha ákelýdi rastaityn qujat bolady», - dep eskertti Memlekettik kirister komitetinde.
EAEO Keden kodeksiniń 264-babynyń 6-tarmaǵyna jáne 275-babynyń 2-tarmaǵyna sáikes, ýaqytsha ákelingen kólik quraldary EAEO kedendik aýmaǵynda deklaranttyń, iaǵni kólik quralyn ákelgen tulǵanyń, naqty menshiginde jáne paidalanýynda bolýy kerek.
Degenmen, búgingi tańda Abhaziia jáne Ońtústik Osetiiadan ýaqytsha ákelingen kólik quraldary EAEO kedendik aýmaǵynda bolǵan kezeńde, zańmen belgilengen shekteýdi buza otyryp, senimhat boiynsha (ielený, ielikten shyǵarý quqyǵymen) Qazaqstan Respýblikasynyń azamattaryna satý oryn alǵany belgili.
Vedomstvo dereginshe, Abhaziia jáne Ońtústik Osetiianyń tirkeý nómirlik belgileri bar kólik quraldaryn EAEO kedendik aýmaǵyna ákelýdi ári Qazaqstan Respýblikasynyń rezidentterine berýdi júzege asyrǵan tulǵalardyń, sondai-aq memleketke keltirilgen zalal somasyna qarai kedendik tólemderdi tólemei jáne Qazaqstan aýmaǵynda paidalaný maqsatynda osyndai kólik quraldaryn satyp alǵan tulǵalardyń áreketteri qylmystyq nemese ákimshilik quqyq buzýshylyq sipatqa ie.
«Osyǵan orai, QR QM Memlekettik kirister komiteti Qazaqstannyń barlyq azamattaryna Abhaziia jáne Ońtústik Osetiia tirkeýinde turǵan ári ýaqytsha ákelingen kólik quraldaryn satyp alǵan jaǵdaida, kedendik tazartýdan ótkizip, kedendik bajdar men salyqtardy tólegennen keiin ǵana Qazaqstan aýmaǵynda atalǵan kólik quraldaryn paidalanýǵa bolatynyn eskertedi», - dep atalyp ótken komitet habarlamasynda.
