Foto: jeke muraǵat
Jazýshy Bolat Júnisbekov jaqynda jaryq kórgen «Kúnge asyǵý. Abai – Zamanai syry» atty roman-novellasynyń birneshe danasyn elimizdiń bas kitap ordasy – Ulttyq kitaphana qoryna syiǵa tartty.
Hakim Abaidyń 180 jyldyǵyna orai jaryq kórgen bul kólemdi shyǵarma – myńdardyń arman-muraty men muń-zaryn myń birinshiniń, iaǵni Abaidyń jáne birneshe urpaqtyń ókili – Zamanaidyń jan syry arqyly kórkem beinelegen týyndy.
Týǵan halqyn órkeniet tórinen kórgisi kelgen Abai men sol ideianyń jalǵastyǵy – Zamanaidyń syry arqyly avtor oqý-bilim men ilim-ǵylymnyń jasampaz kúsh ekenin aiqyndaidy. Bul – jaryq pen kúnge bet burýdyń kórkem simvoly.
Roman tórt taraýdan turady: «Súiiný», «Kúiiný», «Sýyný», «Seiilý». Ár taraý úsh bólimnen quralǵan novellalar arqyly órbidi.
Máselen, Zamanai «Súiiný» taraýyndaǵy «Kelý», «Oianý», «Kórý» bólimderi men «Kúiiný» taraýyndaǵy «Taný», «Aitý», «Taqymdaý» bólimderinde ult muratyn ortaǵa salady. Al el armanyna degen senimniń úzilýi men qaita oralýy «Sýyný» taraýyndaǵy «Túrshigý», «Túńilý», «Qaitý» jáne «Seiilý» taraýyndaǵy «Oralý», «Sergý», «Serpilý» bólimderinde beinelenedi.
Roman-novella «Aisyz túnde. Myń birinshiniń muńy» atty alǵysózben bastalyp, «Tań aldynda qarańǵy. Ult bolashaǵy – bilimpaz urpaq» novellasymen túiindeledi.
Biyl – elimizdiń táýelsizdik kezeńindegi eleýli jyl. Uly aqyn, oishyl Abai Qunanbaiulynyń 180 jyldyq mereitoiynyń atalyp ótýi – osynyń dáleli. Bul týyndyda ata-baba armanymen, hakim Abaidyń murat-maqsatymen jáne búgingi urpaqtyń tilegimen astasqan órkenietke bastar jol – oqý men bilimge umtylys ózek etilgen.
Buǵan deiin Bolat Júnisbekovtiń Abai murasyna arnalǵan zertteý eńbekteri – «Abai sáýlesi», «Aqiqat ushqyny» jinaqtary, sondai-aq «Abaidyń aqyn uldary», «Alash – ALJIR» kitaptary jaryq kórgen. Ol «Abai sáýlesi» eńbegi úshin halyqaralyq «Alash» ádebi syilyǵynyń laýreaty atanǵan. Sonymen qatar, jazýshy «Ý» roman-essesi, «otAsý» roman-dilogiiasy, «Shýaq», «Ǵaiyp» kitaptary arqyly da oqyrmanǵa keńinen tanys.
