Foto: primeminister.kz
Úkimette Premer-Ministr Álihan Smaiylovtyń tóraǵalyǵymen ótken keńeste Abai oblysyndaǵy iri tabiǵi órtti joiý sharalary talqylandy, dep habarlaidy "Ult aqparat" primeminister.kz saityna silteme jasap.
Qazir órttiń jalpy aýdany 60 myń ga-dan asady. Ony sóndirýge TJM, Qorǵanys ministrligi, IIM, ETRM jáne jergilikti atqarýshy organdardyń kúshteri men quraldary jumyldyrylǵan. Atap aitqanda, 800-ge jýyq adam, 190 tehnika jáne 8 tikushaq tartyldy.
TJM derekterine sai, órt Talitsa, Kashtak, Baryshevka, Ýspenka, Podnebesnoe jáne Kamyshenka eldi mekenderine qarai úsh baǵytta taralyp jatyr. TJ aýdanyn qalyń tútin basqanymen, joǵary betinde lapyldap janyp jatqan joq, oǵan aýa raiy jaqsy áser etti – túnde jáne tańerteń sirkirep jańbyr jaýdy.
Aviatsiialyq tehnika belsendi jumys istep jatyr. Oǵan qosa TJ ornyna qosymsha kúshter men quraldar tartylýda. Qatty órtenip jatqan ýchaskelerde tehnika úzdiksiz jumys isteýi úshin sý jetkizilip otyrady. Azamattar úshin ýaqytsha ornalastyrý oryndary jabdyqtalǵan. Eldi mekenderge tóngen qaýip seiildi. Jumys – baqylaýda.
Premer-Ministr Memleket basshysynyń tapsyrmasy boiynsha iri tabiǵi órtti joiý jáne azamattardyń qaýipsizdigin qamtamasyz etý úshin qajetti tehnikalyq jáne adami resýrstardyń barlyǵy jumyldyrylǵanyn atap ótti. Sondai-aq Álihan Smaiylov qosymsha tehnika men qyzmetkerlerdiń órt sóndirý oryndaryna jedel jetýin qamtamasyz etýdi talap etti.
Sonymen qatar Premer-Ministr Eńbek jáne halyqty áleýmettik qorǵaý ministrligine tótenshe jaǵdaidan zardap shekken otbasylarǵa áleýmettik kómek kórsetý máselesin pysyqtaýdy, Densaýlyq saqtaý ministrligine qajet bolǵan jaǵdaida azamattarǵa ýaqytyly meditsinalyq kómek kórsetý máselesin baqylaýda ustaýdy, IIM-ge qoǵamdyq tártipti saqtaýdy jáne turǵyndar múlkin qaraýdy tapsyrdy.
Qabyldanǵan sharalar týraly Abai oblysynyń ákimi Nurlan Uranhaev, qorǵanys ministri Rýslan Jaqsylyqov, ekologiia jáne tabiǵi resýrstar ministri Zúlfiia Súleimenova baiandama jasady.
