Foto: Polisia.kz
Abai oblysyndaǵy túrmelerdiń birinde jazasyn ótep jatqan er adam ómirinde birinshi ret bilim almaq, dep habarlaidy Polisia.kz.
Abai oblysyndaǵy túrmelerdiń birinde №2 jalpy bilim beretin orta mekteptiń qoldaýymen 21-53 jas aralyǵyndaǵy adamdar sabaq oqi alady. Sol adamdardyń arasynda ómirinde birinshi ret saýatyn ashyp otyrǵan 53 jastaǵy azamat erekshe kózge túsken eken.
«Balalyq shaǵym jumys istep, eki qaryndasymdy baǵýmen ótti. Áke-sheshem kóp ishetin, sondyqtan, meni mektepke aparǵan da joq. Jastyq shaǵym ártúrli qamaý mekemelerinde ótti. Osy jasqa kelip túsingenim – eger bilim alǵanda taǵdyrym basqasha bolar ma edi. Degenmen, eshten kesh jaqsy», – deidi sottalǵan azamattyń ózi.
Al, qamaý mekemesiniń basshysy Jeńisbek Dáýrenbekov bilim – sottalǵandar úshin túrmeden shyqqannan keiin jańa múmkindik syilaityn qural deidi.
