Bektóre Sultan Abai oblysynyń PD basshysy bolyp taǵaiyndaldy, - dep habarlaidy "Ult aqparat" Polisia.kz saityna silteme jasap.
"QR Prezidenti Ákimshiliginiń kelisimi boiynsha Qazaqstan Respýblikasy Ishki ister ministri Marat Ahmetjanovtyń buiryǵymen oblystyq Politsiia departamentiniń bastyǵy laýazymyna politsiia general-maiory Bektóre Sultan Jeńisbaiuly taǵaiyndaldy.
Politsiia departamentiniń jańa basshysyn jeke quramǵa Ishki ister ministriniń orynbasary Erjan Sádenov tanystyrdy", - delingen habarlamada.
Bektóre Sultan 1974 jyly 2 naýryzda Shymkent oblysy Túlkibas aýdany Vannovka aýylynda dúniege kelgen. 1995 jyly QR IIM Almaty joǵary mektebin, 2003 jyly QR IIM Akademiiasyn bitirgen. Bilimi zańger, ishki ister organdarynyń basqarý salasynyń magistri.
Quqyq qorǵaý organdarynda 1991 jyldyń 1 qyrkúieginen bastap jumys isteidi, qyzmettik mindetterin Ońtústik Qazaqstan oblysy IIB tergeýshisi qyzmetinen bastaǵan. Qyzmet etken jyldary túrli basshylyq laýazymdarda, onyń ishinde Soltústik Qazaqstan, Ońtústik Qazaqstan jáne Túrkistan oblystarynyń IID bastyǵynyń orynbasary bolyp jumys istegen. 2019 jyldan bastap Qyzylorda oblysy Politsiia departamentiniń bastyǵy qyzmetin atqarǵan.
