«Abai» jáne «Ál-Farabi» atty jańa telehikaialar otandyq kino óndirisine tyń serpin berdi deýge tolyq negiz bar. Óitkeni, eki telehikaianyń da sapasy, akterler quramynyń sheberligi joǵary deńgeide.
Bul týraly QR Parlamenti Senatynyń tóraǵasy Máýlen Áshimbaev Facebook-tegi paraqshasynda jazdy, dep habarlaidy "Ult aqparat".
«Biyl elimiz uly dalanyń ulyq tulǵalary Ál-Farabi men Abaidyń mereitoilaryn atap ótti. Memleket basshysy aitqandai, bul toi toilaý úshin emes, oi oilaý úshin qolǵa alynǵan dúnie ekeni belgili. Osy bir ataýly jyldy «Qazaqstan» ulttyq telearnasy tamasha túiindedi desek, artyq bola qoimas.
Barshańyzǵa belgili, mereke kúnderi elimizdiń basty arnasynan «Abai» jáne «Ál-Farabi» atty jańa telehikaialar qalyń kórermenge jol tartty. Táýelsizdik kúnine tartý retinde usynylǵan bul týyndylar otandyq kino óndirisine tyń serpin berdi deýge tolyq negiz bar. Óitkeni, eki telehikaianyń da sapasy, akterler quramynyń sheberligi joǵary deńgeide.
Shyn máninde, osyndai kórkem týyndylardy kópten kútken edik. Sol sebepti, erekshe yqylaspen qaradyq. Ásirese, «Abaida» oishyldyń estelikteri arqyly sol kezdegi qazaqtyń qily taǵdyryna erekshe ekpin berilgeni kóńilge qonymdy boldy. Osy jerde barshamyzǵa Abai beinesimen tanylyp ketken akter Bolat Ábdilmanovtyń talantyn airyqsha atap ótken jón», - deidi Senat tóraǵasy.
Sondai-aq ol sózinde «Ál-Farabi» serialy Ábý Nasyrdyń bala kúninen álemge aty máshhúr ǵulama bolǵanǵa deiingi ómirin sýretteitinin aitady. Uly ustazdyń ǵibratty ǵumyry, bilim jolyndaǵy qajyr-qairaty áserli kórsetilgen. Bul tarihi týyndyny naǵyz tabandylyqtyń, ǵylymǵa, ónerge degen qushtarlyqtyń, Otanǵa, týǵan jerge degen mahabbattyń ozyq úlgisi deýge ábden bolady.
«Jalpy, kino óneri – adamnyń kózqarasyna, jan-dúniesine, moraldyq qundylyqtaryna erekshe yqpal etetini belgili. Sonyń ishinde, óskeleń urpaq úshin mańyzy zor. Sondyqtan osyndai taǵylymy mol dúnielerdi zor qýanyshpen qabyldap otyrmyz.
Onyń ústine, dalanyń dara danyshpandary Ál-Farabi men Abai tulǵasy – ómirlik ónege mektebi ekeni sózsiz. Olardy taný arqyly biz ult retinde ózimizdi tani túsemiz. Ál-Farabi men Abaidyń ósietteri arqyly qoǵamda bilim kýltin berik ornyqtyra alamyz. Al, bul qazirgi zamannyń eń basty talaby ekeni barshamyzǵa málim. Sol úshin Qazaqstan Ulttyq Telearnasy-nyń ujymyna alǵysymyzdy bildire otyryp, ulttyq múddeni órge jeteleitin osyndai tyń bastamalar men jarqyn jobalar kóp bolsyn dep tileimiz», - dep jazdy Máýlen Áshimbaev.
