Qyzylorda oblysy Syrdariia aýdandyq tarihi-ólketaný mýzeiinde qazaq halqynyń ardaq tutar tulǵasy - aqyn Abai Qunanbaev tutynǵan shkaf qundy jádiger retinde joǵary baǵalanady, dep habarlaidy QazAqparat tilshisi.
Qundy jádiger Syr óńirine qalai jetti? Aldymen osy jóninde áńgimelei ketelik. Shkafty mýzeige atalmysh aýdan ortalyǵy - Tereńózek kentine jaqyn oryn tepken A.Toqmaǵanbetov aýylynyń turǵyny Ahmetbek Iskendirov tabys etken eken. Baǵaly jádiger alǵashqyda Qunanbaidyń týysy Turǵan esimdi kisige berilgen. Ol óziniń aýylyna tórkindep barǵanda oǵan qazaqtyń oishyl aqyny - Abai estelik retinde atalmysh shkafty tartý etedi.
«Odan keiingi kezeńde ol kisi qyz bosanyp, oǵan Abaidyń ájesi - Zereniń esimin qoiady. Zere boi jetip, beride Syr óńirine kelin bolyp túsedi. Ol qazir Asqar aýylynda turyp jatyr. Kelin bolyp túskende oǵan jasaý retinde osy shkaf ta ózimen birge keledi», - deidi aýdandyq ólketaný mýzeiiniń mamandary.
Ahmetbek Iskendirovtiń aitýynsha, Zere oǵan naǵashy áje bolyp keledi. Iaǵni, anasynyń sheshesi eken. Kóneniń kózindei dúnie osylaisha Ahmetbek Iskendirovtiń otbasyna tiedi. Qanshama jyldar boiy kóziniń qarashyǵyndai saqtap kelgen dúnieni ol kisi beride aýdandyq ólketaný mýzeiine tabys etip, halyqtyń qyzyǵa tamashalaityn qundy jádigeriniń birine ainaldy.
10 tamyzda Abai Qunanbaevtyń ómirge kelgenine 173 jyl tolady. Ataýly kúnde mýzei mamandary arnaiy is-sharalar ótkizýdi dástúrge ainaldyrǵan.
