قىزىلوردا وبلىسى سىردارييا اۋداندىق تاريحي-ٶلكەتانۋ مۋزەيٸندە قازاق حالقىنىڭ ارداق تۇتار تۇلعاسى - اقىن اباي قۇنانباەۆ تۇتىنعان شكاف قۇندى جەدٸگەر رەتٸندە جوعارى باعالانادى, دەپ حابارلايدى قازاقپارات تٸلشٸسٸ.
قۇندى جەدٸگەر سىر ٶڭٸرٸنە قالاي جەتتٸ? الدىمەن وسى جٶنٸندە ەڭگٸمەلەي كەتەلٸك. شكافتى مۋزەيگە اتالمىش اۋدان ورتالىعى - تەرەڭٶزەك كەنتٸنە جاقىن ورىن تەپكەن ا.توقماعانبەتوۆ اۋىلىنىڭ تۇرعىنى احمەتبەك ٸسكەندٸروۆ تابىس ەتكەن ەكەن. باعالى جەدٸگەر العاشقىدا قۇنانبايدىڭ تۋىسى تۇرعان ەسٸمدٸ كٸسٸگە بەرٸلگەن. ول ٶزٸنٸڭ اۋىلىنا تٶركٸندەپ بارعاندا وعان قازاقتىڭ ويشىل اقىنى - اباي ەستەلٸك رەتٸندە اتالمىش شكافتى تارتۋ ەتەدٸ.
«ودان كەيٸنگٸ كەزەڭدە ول كٸسٸ قىز بوسانىپ, وعان ابايدىڭ ەجەسٸ - زەرەنٸڭ ەسٸمٸن قويادى. زەرە بوي جەتٸپ, بەرٸدە سىر ٶڭٸرٸنە كەلٸن بولىپ تٷسەدٸ. ول قازٸر اسقار اۋىلىندا تۇرىپ جاتىر. كەلٸن بولىپ تٷسكەندە وعان جاساۋ رەتٸندە وسى شكاف تا ٶزٸمەن بٸرگە كەلەدٸ», - دەيدٸ اۋداندىق ٶلكەتانۋ مۋزەيٸنٸڭ ماماندارى.
احمەتبەك ٸسكەندٸروۆتٸڭ ايتۋىنشا, زەرە وعان ناعاشى ەجە بولىپ كەلەدٸ. ياعني, اناسىنىڭ شەشەسٸ ەكەن. كٶنەنٸڭ كٶزٸندەي دٷنيە وسىلايشا احمەتبەك ٸسكەندٸروۆتٸڭ وتباسىنا تيەدٸ. قانشاما جىلدار بويى كٶزٸنٸڭ قاراشىعىنداي ساقتاپ كەلگەن دٷنيەنٸ ول كٸسٸ بەرٸدە اۋداندىق ٶلكەتانۋ مۋزەيٸنە تابىس ەتٸپ, حالىقتىڭ قىزىعا تاماشالايتىن قۇندى جەدٸگەرٸنٸڭ بٸرٸنە اينالدى.
10 تامىزدا اباي قۇنانباەۆتىڭ ٶمٸرگە كەلگەنٸنە 173 جىل تولادى. اتاۋلى كٷندە مۋزەي ماماندارى ارنايى ٸس-شارالار ٶتكٸزۋدٸ دەستٷرگە اينالدىرعان.
