1 qazan – halyqaralyq Qarttar kúnine orai Semei qalasynda saltanatty qabyldaý sharasy ótti. Qariialarǵa qurmet kórsetýge arnalǵan jiynǵa oblys ákimi Berik Ýáli, óńirdiń qala-aýdandarynan ardagerler qatysty, dep habarlaidy ult.kz.
Aimaq basshysy ardagerlerdi merekemen quttyqtap, olardyń qoǵamdaǵy orny men sińirgen eńbegine qurmet bildirdi.
«Barshańyzdy Halyqaralyq qarttar kúnimen shyn júrekten quttyqtaimyn! Qazaqta: «Qarty bar úidiń qazynasy bar», – deidi. Rasynda, úlkendi syilap, aqsaqaldy tórge shyǵaryp, aq jaýlyqty anany ardaqtaǵan ataly joldy búginde jalǵastyrmaq nietimiz bar. Sondyqtan búgingi basqosýymyzdyń «Qarttarǵa qurmet – urpaqqa mindet» dep atalýynyń ózinde úlken mán jatyr. Sizderdiń elge sińirgen qyzmetterińiz ben ómirden túigen tájiribelerińiz keiingi býyn úshin úlgi-ónege, baǵa jetpes qazyna. Memleket basshysy Qasym-Jomart Kemeluly Toqaev aǵa býynǵa degen qurmet pen olardyń áleýmettik ál-aýqatyn arttyrý máselesine erekshe mán berip keledi. «Ardagerler týraly» zań osy baǵyttaǵy memlekettik qoldaýdy júieleýge berik negiz qalady. Prezidentimiz qoǵamda «Zań men tártip», «Adal azamat» qaǵidattaryn ornyqtyrýǵa erekshe mán beredi. Bul qundylyqtardy jas urpaqtyń boiyna sińirýde sizderdiń aqyl-keńesterińiz ben ómirlik tájiribelerińizdiń orny bólek. Sizderge zor densaýlyq, uzaq ǵumyr, jaqyndaryńyzǵa amandyq, shańyraqtaryńyzǵa baq-bereke tileimin», – dedi Berik Ýáli.
Shara barysynda óńirdiń ár salasynda eńbegimen elengen ardagerler «Abai oblysyna sińirgen eńbegi úshin» tósbelgisimen, oblys ákiminiń Alǵys hattarymen, respýblikalyq Ardagerler uiymynyń «Qurmet» tósbelgisimen jáne Alǵys hattarymen marapattaldy.
Jyly ráýishte ótken kezdesýde ardagerler eldiń bereke-birligi, jastardyń bolashaǵy týraly oilaryn ortaǵa saldy.
Abai oblysynda ardagerlerdi qoldaýǵa baǵyttalǵan jumystar júieli túrde júrgizilýde. Biyl Uly Otan soǵysynyń ardagerine 5 million teńge kóleminde birjolǵy áleýmettik kómek kórsetildi. Jeńis kúni qarsańynda 1 146 adamǵa 158 myń teńge kóleminde birjolǵy áleýmettik kómek berildi.
Búginde aimaqta 2 639 zeinetker arnaiy áleýmettik qyzmettermen qamtylǵan. Qart jandardyń belsendi ómir saltyn jalǵastyrýyna da jaǵdai jasalýda. Qazirgi tańda oblysymyzda 395 bastaýysh ardagerler uiymy, 2 qalalyq jáne 10 aýdandyq ardagerler keńesi jumys isteidi.
Óńirde 2 «Belsendi uzaq ómir súrý ortalyǵy» jumys isteidi. Biyl olardyń qataryna Kýrchatov qalasynda ashylǵan jańa ortalyq qosyldy. Semei qalasyndaǵy ortalyqtyń 3 filialy bar. Qazirgi tańda bul ortalyqtarda 608 zeinetker túrli qyzmettermen qamtylyp otyr.
