Abai oblysynda III oblystyq «Myń bala» mádeni-aǵartýshylyq baiqaýynyń óńirlik irikteý kezeńi óz máresine jetti. Biylǵy baiqaýǵa óńirdiń túkpir-túkpirinen 33 ónerpaz qatysyp, «Áleýmettik jelilerdegi mánerlep oqý» jáne «Birlikke ún qosqan» mýzykalyq nominatsiialary boiynsha baq synady. Qazylar alqasy qatysýshylardyń oryndaýshylyq sheberligin, shyǵarmany kórkem jetkizý mánerin, qazaq tilin meńgerý deńgeiin jáne shyǵarmashylyq ereksheligin baǵalady.
Foto: Abai oblysy ákimdigi
Abai oblysynyń ishki saiasat basqarmasynyń basshysy Jarqyn Túsipbekuly baiqaýdyń memlekettik tildi damytý men qoǵamdyq kelisimdi nyǵaitýdaǵy mańyzyn atap ótti.
– Memleket basshysy jastardyń qoǵamdyq kelisim men etnosaralyq tatýlyqty saqtaýda, memlekettik tildiń qoldanys aiasyn keńeitýde mańyzdy ról atqaratynyn únemi aityp keledi. Osy turǵyda «Myń bala» jobasy da óz nátijesin kórsetip otyr. Jobaǵa qatysqan jastar memlekettik tildi meńgerip qana qoimai, qazaq halqynyń mádenieti men salt-dástúrin tanyp, óz óneri men qabiletin damytýǵa múmkindik alady. Búginde olardyń arasynan túrli salada eńbek etip, el damýyna úles qosyp júrgen azamattar bar. Bul – jobanyń naqty nátijesi. «Myń bala» memlekettik tildi úirenýge yntalandyryp, el birligin nyǵaitýǵa baǵyttalǵan mańyzdy alań, – dedi basqarma basshysy.
Óńirlik kezeńniń qorytyndysy boiynsha Semei qalasyndaǵy Q.Sátbaev atyndaǵy №2 mekteptiń 5-synyp oqýshysy Soloviova Sofiia jeńimpaz atanyp, respýblikalyq kezeńge joldama aldy. Ol aldaǵy baiqaýda Abai oblysynyń namysyn qorǵaidy.
Sondai-aq, «Áleýmettik jelilerdegi mánerlep oqý» nominatsiiasynda Maltsev Rýslan I orynǵa ie bolsa, Tlekuly Dinmuhamed II oryn, Sýleimenova Aiaýlym III oryndy ielendi. Al «Birlikke ún qosqan» mýzykalyq nominatsiiasynda Soloviova Sofiia jeńimpaz atansa, Ashimova Kamilla II orynǵa, Zagidýllina Naima III orynǵa laiyq dep tanyldy.
Baiqaý qorytyndysynda jeńimpazdar men júldegerler diplomdarmen jáne baǵaly syilyqtarmen marapattaldy.
Foto: Abai oblysy ákimdigi
