QR Prezident ákimshiligi basshysynyń birinshi orynbasary Dáýren Abaev «Ashyq dialog 2» suhbatynyń kezekti sanynda Prezident Joldaýyna qatysty pikir bildirdi, dep habarlaidy QazAqparat.
«Joldaýdyń ishinen naqty bir nárseni jeke bólip aitý qiyn. Óte kóp júieli sharalardy qamtyǵan keshendi qujat bolyp shyqqan. Biraq shartty túrde alsaq, Prezident ataǵan mańyzdy tezistiń biri – halyqty jaiylymmen qamtamasyz etý, aýyl turǵyndarynyń qolyn jaiylymdarǵa jetkizý máselesi. Aitpaqshy, bul jergilikti ákimderdiń tiimdiligin anyqtaityn mańyzdy ólshem bolady. Kóbi «Jaiylymda turǵan ne bar? Aýyldyń ǵana máselesi ǵoi» dep oilaýy múmkin. Biraq bul strategiialyq mańyzy bar másele jáne bárimizge qatysy bar. Aýyldyń ǵana emes qala turǵyndaryna da qatysty. Nege? Óitkeni dúken sórelerindegi sút pen et ónimderiniń baǵasy osyǵan táýeldi. Neǵurlym qoljetimdilik kóbirek bolsa, tańdaý aiasy da keń bolady. Al tańdaý kóp bolsa, baǵa arzanyraq bolady», - deidi Dáýren Abaev.
Sondai-aq, ol Joldaýda sý sharýashylyǵymen bailanysty keshendi sharalardyń jobasy aitylǵanyn eske saldy.
«Ákimder jumysynyń tiimdiligi týraly jalǵastyratyn bolsaq, sý infraqurylymyn da qosa keter edim. Prezident búkil el boiynsha 120 sý arnasynyń infraqurylymyn jańǵyrtyp, 9 jańa sý qoimasyn salýdy tapsyrdy. Bul – óte úlken jumys jáne máni zor kórsetkish. Prezident udaiy jabyq áleýmettik saraptama alyp otyrady. Sonyń ishinde sý máselesi azamattarymyzdy alańdatatyn máselelerdiń úshtiginen túspeidi. Kei óńirlerde sýdyń sapasy azamattar úshin jeke tabysynan da ózekti máselege ainalǵan. Bul - sonshalyq alańdarlyq másele. Sondyqtan onymen ainalsý kerek. Prezident sondyqtan osyndai mindet qoiyp otyr», - dedi Prezident ákimshligi basshysynyń birinshi orynbasary.
