Aqparat jáne qoǵamdyq damý ministri Dáýren Abaev QR Prezidenti qyzmetinen ketetini týraly áleýmettik jelidegi áńgimelerge qatysty aitty, dep habarlaidy "Ult aqparat".
«2019 jyldyń 19 naýryzy shyn máninde tarihi kúnge ainaldy. Bul kún bizdiń elimizdi ózgertti, tarihymyzdaǵy jańa meje bastaldy. Árine, bul sheshim barlyǵymyz úshin tosynnan keldi. Menińshe, Elbasynyń bul sheshiminiń tereńdigi men danalyǵyn biraz jyldardan keiin ǵana sezinetin bolamyz. Al naqty baǵasyn bizdiń balalarymyz, tipti nemerelerimiz berýi múmkin», - dedi ministr «Habar» telearnasyndaǵy «Ashyq dialog» baǵdarlamasynda.
Sonymen birge, D. Abaev bilik tranzitiniń bir jyldyǵy aiasynda «Prezidenttiń óz qyzmetinen ketetini» týraly qańqý sózderge pikir bildirdi.
«Shynymdy aitsam, mundai «as úidiń áńgimesine» pikir bildirýdiń ózi yńǵaisyz. Biraq, bul taqyryptyń tarap ketkeni sonshalyqty, qurmetti sarapshylar men jýrnalisterden bastap, emdeýde jatqan nashaqorlarǵa deiin talqylap júr. Jai ǵana qajetti, naqty máselelerge kóńil bóleiik degim keledi. Bálkim, bizdiń nazarymyzdy ózekti máselelerden burǵysy keletinder bar shyǵar», - dedi ol.
Ministrdiń aitýynsha, barlyq feik-aqparattarǵa quzyrly organdar ózderiniń quqyqtyq baǵasyn beredi.
«Qazir mańyzdy máselelerge kóńil bólýimiz qajet. Bizdiń zańdy túrde taǵaiyndalǵan, halyqtyń senimi men Elbasynyń qoldaýyna qol jetkizgen Prezidentimiz bar», - dedi Dáýren Abaev.
