QR Prezidenti ákimshiligi basshysynyń birinshi orynbasary Dáýren Abaev «Ashyq dialog 2» suhbatynyń kezekti sanynda Prezident Joldaýynda aitylǵan beibit atom bastamasynyń mánin túsindirdi, dep habarlaidy QazAqparat.
«Prezident qaýipsiz ári ekologiialyq atom energetikasyn damytýdyń múmkindigin zerdeleýdi mindet etip qoidy. Dál qazir tek zerdeleý máselesi ǵana tur. Eshkim qazir jáne dál osy jerde sheshim qabylda dep otyrǵan joq. Ekinshi jaǵynan kelsek, bárimiz energiiamen jabdyqtaý salasynda problema bar ekenin jáne onyń jyl saiyn artyp kele jatqanyn túsinýimiz kerek. Nege? Óitkeni eldiń ekonomikasy, halqynyń sany ósip keledi. Sondyqtan energiiamen jabdyqtaý máselesi jyl saiyn ózekti bola túsedi», - degen Dáýren Abaev energiiamen jabdyqtaý salasyndaǵy problemalardyń alǵysharttary qazirdiń ózinde sezile bastaǵanyn atady.
«Buǵan eshkimniń daýy joq shyǵar jáne bári túsinip otyrǵan da shyǵar. Óitkeni ózderi de osy máselemen betpe-bet kelip jatady. Jylytý maýsymdary bul máseleniń bar ekenin kórsetip otyr. Mysaly, bir óńirde kómir tapshylyǵy paida bolsa, kelesi óńirde baǵasy sharyqtap jatady. Taǵy bir óńirde elektr úzile beredi degen siiaqty. Jańa ǵana aitqanymdai, tutyný kólemi ósken saiyn bul máseleni zerdelemei bolmaidy. Ol máseleni sheshýdiń bir joly – beibit atom. Prezident sondyqtan osy máseleni pysyqtaýdy tapsyrdy», - dedi Prezidet ákimshiligi basshysynyń birinshi orynbasary.
