QR Prezidenti Ákimshiligi Basshysynyń birinshi orynbasary Dáýren Abaev «Ashyq dialog» suhbatynyń bul jolǵy sanynda Soltústik Qazaqstan oblysy Aiyrtaý jáne Esil aýdandary ákimderiniń qyzmetinen alynýyna qatysty pikir bildirdi, dep habarlaidy QazAqparat.
Eske salsaq, Memleket basshysy Qasym-Jomart Toqaev «Kazahstanskaia pravda» gazetinde jariialanǵan «Zalojniki ravnodýshiia» atty maqalada aitylǵan máselege nazar aýdaryp, tekserý qorytyndysy boiynsha ońtústik óńirlerden qonys aýdarǵandarǵa durys jaǵdai jasamaǵan eki aýdannyń ákimi qyzmetinen alynǵan bolatyn.
Dáýren Abaev suhbat barysynda bul shara atalmysh keleńsizdikke qatysty Prezident qabyldaǵan sheshimniń bir bóligi ǵana ekenin atady.
«Jalpy siz aityp otyrǵan mysaldy «Halyq únine qulaq asatyn memleket» tujyrymdamasynyń ómirde iske asýy dep aitýǵa bolady. Biraq ákimderdi qyzmetinen alý – Memleket basshysynyń bul keleńsizdikke nazar aýdarýynyń bir bóligi ǵana. Árine, sheneýnikterdi jazalap, jumystan alý jýrnalister úshin árqashan tartymdy aqparattyq sebep ekenin bilesiz. Biraq munyń artynda basqa da jumystar jatyr. Prezident eńbek tapshylyǵy bar óńirlerden halyqty kóshirý isiniń sapaly atqarylýyn tapsyrǵan bolatyn», - dedi Prezident Ákimshligi Basshysynyń birinshi orynbasary.
Dáýren Abaev bul baǵdarlamanyń maqsaty Ońtústik pen Soltústik arasyndaǵy demografiialyq teńgerimsizdikti joiý ekenin eske saldy.
«Bul jumys josparly túrde, naýqanshyldyqqa salynbai, san qýalap ketpei iske asýy kerek. Qonys aýdarýshylarǵa jaǵdai jasaý qajet. Bul – aksioma. Biraq qonys aýdarýshylar da jańa ortaǵa beiimdelip, integratsiiaǵa túsý kerektigin túsingeni abzal. Tek ákimdikke shaǵymdana bermei, óz taǵdyry úshin jaýapkershilikti óz qoldaryna alýy kerek. Kóbi surap jatyr. Aýdan ákimderine nege qatań jaza qoldanyldy? Ony da ońai túsindirýge bolady. Óitkeni bul baǵdarlama adamdardyń taǵdyrymen bailanysty», - dedi ol.
