Prezident Ákimshiligi basshysynyń birinshi orynbasary Dáýren Abaev «Ashyq dialog» suhbatynyń kezekti sanynda Japoniia astanasynda ótken Jazǵy Olimpiada oiyndarynyń nátijesi týraly pikir bildirdi, dep habarlaidy "Ult aqparat".
«Memleket basshysy Olimpiadaǵa qatysty óz pikirin bildirdi. Olimpiada komandasynyń nátijesi elimizdiń sporttyq áleýetine sáikes kelmeidi. Meniń oiymsha, bul pikirmen bári kelisedi», - dedi ol suhbat barysynda.
Onyń aitýyna qaraǵanda, mundai jaǵdaida bireýdi jumystan shyǵaryp, qalyptasqan júieni qaita qurý arqyly eldiń kóńilin tynyshtandyrýǵa bolady. Biraq ol júieli kemshilikterdi sheshpeýi múmkin.
«Qazir aldymyzda turǵan mindet basqa – qateliktermen jumys istep, osy saladaǵy barlyq protsesterdi taldaý kerek. Aitpaqshy, Prezident negizgi baǵdardy nusqady. Bul – buqaralyq jáne balalar sportyn damytý. Osy baǵytqa túsýimiz kerek. Iaǵni, eń bastysy – aýyldarda qaladaǵydai sporttyq infraqurylym qalyptastyryp, múmkindiginshe balalardy tegin sport sektsiialaryna kóbirek tartý. Árine, bilikti jattyqtyrýshylar men nusqaýshylardy daiarlaý qajet», - Prezident Ákimshiligi basshysynyń birinshi orynbasary.
Sondai-aq, ol Olmpiada qorytyndysy boiynsha úlken taldaý jasalyp, reviziialyq jumys júrgiziletinin atady.
«Reviziialyq jumystardyń barysy Qasym-Jomart Kemelulynyń tikelei baqylaýynda bolady. Álqissa bolsyn, Prezident kúzde sport boiynsha úlken keńes ótkizýdi josparlap otyrǵanyn aitaiyn. Árine, sport salasyndaǵy barlyq jańalyqtar týraly jurtshylyqqa óz kezinde habarlanady», - dedi Dáýren Abaev.
