QR Aqparat jáne kommýnikatsiialar ministrliginiń búgingi keńeitilgen alqa májilisinde «Shalqar» radiosynyń jýrnalisi Temirxan Mombekuly ministrge memlekettik til máselesine qatysty suraq qoidy, dep habarlaidy Ult.kz tilshisi QazAqparat agenttigine silteme jasap.
Óz sózinde ol keńester kezindegi qazaq tildi basylymdardy ashýdyń mashaqatyn eske alyp, aqparat salasyndaǵy tildik saiasat problemasyn qozǵady. Ministr Abaev osy máselege qatysty óz ustanymyn bildirdi.
«Ol kúrdeli másele ekenin bárimiz jaqsy bilemiz. Ekrandaǵy mátin nege qazaqsha jazylmaidy, baiandamany nege shet tilde jasaidy dep aityp jatyrsyz. Eń aldymen Qazaqstannyń egemen el bolǵanyna táýba etý kerek. Bizde bári aman-esen, tynysh. Qazaqtyń sany kóbeiip keledi. Balalardyń 90 paiyzdan astamy qazaq tildi mektepterge baryp jatyr. Soǵan táýba etý kerek. Jańa Petropavldyń atyn aýystyrý týraly aityp otyrsyz. Eger siz dál qazir sol jaqqa baryp, bárimen jaǵalasyp, shý shyǵarsańyz, onyń sońy ne bolady? Qalanyń ataýyn aýystyrasyz, biraq sol jerde júrgen adamdardyń bárin qazaq qyla almaisyz ǵoi. Osy nárseni túsiný kerek», - dedi Abaev.
Ministrdiń aitýynsha, qazaqtyń birneshe tilde sóilei alatynyna maqtaný qajet. Osy oraida ol keshegi Ýniversiadanyń jabylýynda úsh tilde sóz sóilegen Úkimet basshysy men Almaty qalasy ákimin mysal retinde keltirdi.
«Sondyqtan úidegi áńgimeni syrtqa kóp shyǵarmaý qajet. Jumys isteý kerek. Mysaly, siz «Shalqar» radiosynyń myqty jýrnalisi bolsańyz, sapaly ári qyzyqty baǵdarlama jasańyz. Ony myna jerde otyrǵandardyń bári tyńdaidy», - dep atap kórsetti ministr.
