Aqparat jáne qoǵamdyq damý ministri Dáýren Abaev Qazaqstan musylmandary dini basqarmasy aldynda asa mańyzdy, erekshe jaýapty jumys turǵanyn málim etti, dep habarlaidy QazAqparat.
«Bizde tarihi turǵyda qalyptasqan islam dini birkelkiligimen, tózimdiligimen jáne dástúrimizben astasyp jatýymen erekshelenedi. Alaida búgin de, ókinishke qarai, keibir jekelegen adamdar dinniń atyn jamylyp, ekstremizm men terrorizmdi, dini fanatizmdi nasihattap júr. Olar qazaq jerindegi san ǵasyrlyq tarihy bar islamdy, babalarymyz ál-Farabi men Júsip Balasaǵun, Abai men Shákárim dáriptegen dástúrli dinimizden syrt ainalyp, destrýktivti dini aǵymdardyń jeteginde ketti», - dedi Dáýren Abaev elordada ótken III respýblikalyq imamdar forýmynda.
Ministr sondyqtan Qazaqstan musylmandary dini basqarmasy aldynda asa mańyzdy, jaýapty jumys turǵanyn atap ótti.
«Ol - elimizdegi musylman úmbetin qolda bar «altynymyzdyń» qadirin bilýge, ony qasterleýge shaqyrý, babalar murasy – asyl dinimizdi kózdiń qarashyǵyndai saqtaýǵa úiretý. Oǵan qosa, islam dinin ustanýshy azamattarymyzdyń dini bilimin arttyryp, ǵalamdyq suranystarǵa laiyqty jaýap bere alatyn «sapaly úmbet» tárbieleý de kezek kúttirmeitin sharýa. Osy maqsatta bizder naqty jumystardy bastadyq. Búgingi forýmda qabyldanatyn «Jeti rýhani qazyq» Qazaqstan musylmandarynyń Rýhani tuǵyrnamasy atty qujat – halqymyzdyń ulttyq rýhani murasy men qundylyǵyn jańǵyrtyp, buqaraǵa keńinen nasihattaýǵa arnalǵan», - dedi Dáýren Abaev.
Vedomstvo basshysy sondai-aq, forýmda «Dini laýazymdar tizilimi», «Din qyzmetkerleri atqaratyn dini rásimder reti», «Dini laýazymdardyń qyzmettik mindettemeleri» atty qujattar qabyldanatynyn atap ótti. Onyń aitýynsha, bul aýqymdy qujattar – dini saladaǵy ózekti máselelerdi sheshýge, musylman úmbetiniń rýhani suranystaryn qanaǵattandyrýǵa, Dini basqarmanyń bedelin kóterýge, jumysyn júieleýge oń yqpal etedi.
