Aqparat jáne qoǵamdyq damý ministri Dáýren Abaev dárigerler men muǵalimderdi volonterlikke oqytý sharalaryn shetelde júrgizýdi usyndy, dep habarlaidy QazAqparat.
«Volenter jylyn ótkizemiz jáne onyń negizinde tiisti taldaý júrgizemiz. Osydan keiin naqty zańnamalyq bastamalardy jariialaimyz. AQSh-ta eger de adam testileýden barynsha joǵary ball jinasa, bul óz kezeginde onyń oqýǵa túsýine kepildik bermeidi. Osy oraida mindetti túrde onyń qoǵamdyq qyzmetine, sporttyq jetistigine qaraidy, iaǵni jalpy baǵalaý júrgiziledi. Biz de osyndai baǵalaý turǵysynda tiisti qadam jasaýymyz múmkin», - dedi D. Abaev Májilistegi Úkimet saǵatynda.
Onyń sózine qaraǵanda, Volonter jyly aiasynda naqty jobalardy iske asyrý kózdelgen.
«Bizde bilim berý boiynsha naqty joba bolady. Biz joǵary oqý oryndary stýdentterine aýyldarǵa baryp, talantty jastardy tartýǵa ótinish jasaimyz. Bul turǵyda oqý túsý, UBT jáne basqa da sharalar qamtylady. Sondyqtan naqty qadamdarǵa ekpin qoiylady», - dedi ministr.
Munymen qosa, atalǵan baǵytta halyqaralyq yntymaqtastyqty nyǵaitýǵa nazar aýdarylady.
«Bizdiń dárigerlerge, muǵalimderge tájiribe jinaqtaý maqsatynda nege shetelge barmasqa? Osy oraida dárigerlerge tiisti múmkindik jasalar edi», - dedi Dáýren Abaev.
Jalpy usynylǵan sharalar aiasynda densaýlyq baǵytynda qalada jumys istep júrgen bilikti dárigerlerdiń aýyldarǵa baryp, aqysyz járdem kórsetýi eskerilgen.
Esterińizge sala keteiik, QR Prezidenti Qasym-Jomart Toqaevtyń Jarlyǵymen 2020 jyl Volonter jyly dep jariialandy.
