«Álem barysy» - qazaq kúresin Olimpiada oiyndaryna qosý jolyndaǵy aýqymdy jobalardyń biregeii. Bul týraly Qazaq kúresinen absoliýttik «Álem barysy» álem chempionatynyń ashylý saltanatynda QR Aqparat jáne qoǵamdyq damý ministri Dáýren Abaev aitty, dep habarlaidy QazAqparat.
«Búgingi jalaýyn kóterip otyrǵan «Álem barysy» absoliýttik álem chempionatyna qosh keldińizder! «Álem barysy» qazaq kúresin nasihattaýda ózindik orny bar mańyzdy shara. Chempionatyn halyqaralyq deńgeide óziniń joǵary baǵasyn aldy. Oǵan qosa bul shara ulttyq ónerimiz - qazaq kúresin Olimpiada oiyndaryna qosý jolyndaǵy aýqymdy jobalardyń biregeii. QR Tuńǵysh Prezidentiniń kúnine orai uiymdastyrylǵan dúbirli doda mádeni muramyzdy damytýǵa, qazaq kúresin odan ary jetildirip, halyqaralyq deńgeide nasihattaýǵa, qazaq kúresinen «Álem barysyn» anyqtaýǵa arnalady», - dedi Dáýren Abaev.
Sonymen qatar ministr ulttyq kúresten osyndai keremet dobasyn uiymdastyryp otyrǵan Almaty qalasynyń ákimdigine, QR Mádeniet jáne sport ministrligine shynaiy rizashylyǵyn bildirdi.
Sonymen qatar chempionattyń ashylý saltanatynda Olimpiada chempiony Jaqsylyq Úshkempirov sóz sóilep, balýandarǵa sáttilik tiledi.
Aita keteiik, tórtinshi ret ótetin básekege 30 elden 33 balýan qatysady.
«Álem barysy» atanýǵa AQSh, Aýstraliia, Ázerbaijan, Braziliia, Grekiia, Grýziia, Úndistan, Iran, Ispaniia, Italiia, Kamerýn, Kongo, Koreia, Kýba, Qyrǵyzstan, Litva, Mońǵoliia, Niderlandy, Pákistan, Polsha, Resei, Sloveniia,Tájikstan, Túrikmenstan, Túrkiia, Ózbekstan, Ýkraina, Estoniia, Iaponiia sekildi elderdiń jáne Qazaqstannyń ataqty balýandary kelgen. Bul synda elimizdiń namysyn A.Nuǵymarov (ShQO), R.Ábdirazaqov (Almaty qalasy), M.Isaǵabylov (Qyzylorda oblysy), N.Jarylǵapov (Mańǵystaý oblysy) syndy balýandar qorǵaidy.
