Ataýly áleýmettik kómek taǵaiyndaý elimizdegi kedeishilikke qatysty shynaiy jaǵdaidy ashyp berdi. Bul týraly búgin Ortalyq kommýnikatsiialar qyzmetindegi baspasóz máslihatynda QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy "Ult aqparat".
Baspasóz máslihaty barysynda BAQ ókilderi ministrden: «Biyl tabysy kúnkóris deńgeiinen tómen halyqtyń úlesi 4,3 paiyz boldy. 5 jyl buryn bul kórsetkish bar bolǵany 2,9 paiyz edi. Bul halyqtyń ál-aýqatynyń tómendegenin kórsetpei me? Tabysty ádeii jasyrý statistikaǵa qanshalyqty áser etedi?», - dep suraǵan edi.
Saýalǵa jaýap bergen Birjan Nurymbetov resmi memlekettik statistikanyń elimizdegi kedeishilik deńgeiin belgileitin tártibi bar ekenin aitty.
«Bul statistika tabysy kúnkóris sheginen tómen azamattardy sanaidy. Sol statistikanyń birinshi jartyjyldyqtaǵy qorytyndysyna sáikes, elimizdegi halyqtyń 4,3 paiyzynyń ál-aýqaty kedeishilik sheginen tómen. Búgingi tańda 306 myń otbasy nemese 1 mln 600 myń adamǵa AÁK taǵaiyndaldy. Bul - 9 paiyz, aiyrmashylyq bar», - dedi ol.
Ministrdiń aitýynsha, mundai derektiń qalyptasýyna azamattardyń ataýly áleýmettik kómek alý úshin tabysyn jasyryp, jalǵan aqparat berýi de sebep bolyp otyr.
«Ekinshiden, statistika organdary eń tómengi kúnkóris deńgeiin ár óńirde bólek sanaidy. Al ótken toǵyz aida ataýly áleýmettik kómek búkil Qazaqstanda respýblikalyq kórsetkish arqyly taǵaiyndalǵan. Ol joǵary. Jalpy, statistika komitetiniń esebi saýalnama arqyly jasalady. 12 myńǵa jýyq úiden surap shyǵady da, sonyń negizinde jasaidy. Sondyqtan eki eseptiń arasynda kishkene aiyrmashylyq bar. Ataýly áleýmettik kómekti taǵaiyndaý barysynda bizge naqty adamdar keledi. Bul elimizdegi kedeishilikke qatysty shynaiy jaǵdaidy ashyp berdi», - dedi Birjan Nurymbetov.
