Almaty ákimi Baqytjan Saǵyntaev qalamger qaýymmen kezdesip, ataýly granttardy tapsyrdy, - dep habarlady qala ákimdiginiń saity.
Granttar – tamyz aiynda Jazýshylar úiinde ádebiet shyǵarmashylyǵy qyzmetkerlerimen bolǵan kezdesýde aitylǵan qoldaýdyń bir sharasy. Grantqa úmitkerlerdi Qazaqstan Jazýshylar odaǵynyń komissiiasy anyqtaidy. Grant somasy – 500 myń teńge. Qazaqstan Jazýshylar odaǵynyń 820 múshesiniń 360 Almatyda turady.
Qala ákimi osy jyly Qazaqstan Jazýshylar odaǵynyń tarihi ǵimaratyn jóndeý bastalatynyn, nysannyń burynǵy sáýlet kórkin saqtaý basty sharttyń biri ekenin atap ótti. Keler jyly Ádebietshiler úiin jóndeýden ótkizý josparlanǵan.
«2021 jyly biz el Táýelsizdiginiń 30 jyldyǵyn atap ótemiz, keler jyly – uly Abai men ál-Farabidiń mereitoilary. Sizderdiń stsenariilerdi, qoiylymdardy, ádebi shyǵarmany ázirleýge qosatyn úlestirińiz óte baǵaly» - dedi Baqytjan Saǵyntaev.
Ol qoǵamǵa rýhani baǵdardyń qajet ekenin atap ótti. Óz kezeginde, Qazaqstan Jazýshylar Odaǵynyń tóraǵasy Ulyqbek Esdáýlet qoldaýǵa, ásirese jas jazýshylarǵa kórsetilgen senimge alǵys sózin aityp, rizashylyǵyn bildirdi.
«Bizge, halyqtyń ókili retinde ákimniń estýi mańyzdy, demek ol qalalyqtardyń qajettilikteri men úmit-nietin biledi degen sóz. Biz óz tarapymyzdan qala qoǵamdastyǵyn damytýǵa óz úlesimizdi qosý úshin barlyq múmkindikterdi jasaityn bolamyz» - dedi Ulyqbek Esdaýlet.
Ákimniń granttaryn alǵandar ishinde jazýshy-dramatýrg Sofy Smataev, aqyndar Temirhan Medetbek, Israil Saparbai, Nadejda Chernova, Patigúl Maqsatova, Liýbov Shashkova, jas qalamgerler Darhan Beisenbekuly, Maqsat Málik, Qanat Tileýhan, Nurtas Turǵanbek, Jandarbek Jumaǵulov, Ásel Káribai, Doshan Jylqybai, Irina Gýmyrkina, aýdarmashy Nina Skalovskaia, synshy Baǵashar Tursynbaiuly jáne basqalary bar.
