Aqtaýda azamattardan milliardtaǵan teńge jinaǵan "Sax Invest" qarjy piramidasyn uiymdastyrýshylarǵa sot úkimi shyqty. Uiymdasqan qylmystyq toptyń segiz múshesi 6 jyldan 7 jylǵa deiin bas bostandyǵynan aiyryldy, dep habarlaidy ult.kz.
Sot materialdaryna sáikes, kúdiktiler ózderin investitsiialyq qor retinde tanystyryp, turǵyndarǵa baǵaly qaǵazdarǵa, qarjy quraldaryna jáne túrli aktivterge qarjy salýdy usynǵan. Sondai-aq olar Afrika elderindegi almaz óndirý jobasyna qatysyp jatqanyn málimdegen.
2018-2022 jyldar aralyǵynda atalǵan shemaǵa Astana, Aqtóbe, Oral jáne Aqtaý qalalarynan myńnan astam adam tartylǵan. Salymshylardan jinalǵan qarajattyń jalpy kólemi 9 mlrd teńgeden asqan.
Tergeý barysynda aqshanyń basym bóligi kompaniia shottaryna emes, uiymdastyrýshylardyń jeke esepshottaryna aýdarylǵany anyqtalǵan. Keiin bul qarajat jeke qajettilikterge, sonyń ishinde qumar oiyndarǵa, turǵyn úi satyp alýǵa jáne jeke qurylysqa jumsalǵan.
Sot sheshimimen kináli dep tanylǵan segiz adamǵa uzaq merzimdi bas bostandyǵynan aiyrý jazasy taǵaiyndaldy. Sonymen qatar memleket kirisine jeke turǵyn úi men tsifrlyq aktivter tárkilendi.
Sottalǵandardyń múlkine qoiylǵan shekteý azamattyq talaptardy óteý máselesi tolyq sheshilgenge deiin saqtalady. Tárkileýge qatysty múlik qatarynda eki avtokólik, eki páter jáne jer ýchaskesi bar.
Úkim ázirge zańdy kúshine engen joq.
