Foto:WNG2024 telegram
Qazaqstan ulttyq quramasynyń sportshylary Dúniejúzilik kóshpendiler oiyndarynyń besinshi jarys kúninde 5 altyn, 7 kúmis, 2 qola júlde jeńip aldy. Jalpy esepte Qazaqstan qorjynynda 32 altyn, 24 kúmis, 27 qola júlde bar, dep habarlaidy "Ult Aqparat" QR Týrizm jáne sport ministrligi, «Ulttyq jáne at sporty túrleri ortalyǵynyń» baspasóz qyzmetine silteme jasap.
• Kókpardan Qazaqstan ulttyq quramasy Qyrǵyzstan komandasyn 5:4 esebimen jeńip, altyn júldege ie boldy. Al kók bórúden Qazaqstan komandasy Qyrǵyzstan quramasyna 4:10 esebimen ese jiberip, kúmis júlde aldy.
• Etnoaýylda teńge ilýden ótken jarysta Beknur Serikov – bes beles saiysynan, al Rahat Qambarov qos qulash saiysynan altyn júlde aldy.
• Etnoaýylda qusbegilikten irikteý jáne jartylai finaldyq syn ótti. Ulttyq qurama sportshylary búrkit, qarshyǵa jáne suńqar salýdan finalǵa shyqty.
• «Arǵymaq» at-sport kesheninde ótken dástúrli sadaq atýdan jarys óz máresine jetti. Komandalyq saiysta Qazaqstan quramasy Aýstraliiadan kelgen sadaqshylardan 2:3 esebimen jeńilip, kúmis júldege ie boldy. Sadaqshylar Kóshpendiler oiyndaryn bir altyn, eki kúmis, bes qola júldemen aiaqtady.
• Jaqsylyq Úshkempirov atyndaǵy Jekpe-jek saraiynda tatar halqynyń kóne ulttyq belbeý kúresi kóráshten erler arasynda tórt salmaq dárejesi boiynsha jarys ótti. Birjan Shaimerdenov (90 keli) altyn júlde alsa, Ádilet Shalǵynbekuly (64 keli) men Nurdáýlet Jarylǵapov (+100 keli) kúmis júldege ie boldy. Beknur Bektai (75 keli) qola júlde aldy.
• «Alaý» muz saraiynda túrik halqynyń ulttyq kúresi ashyrtmaly aba giýreshinen bes salmaq dárejesi boiynsha jarys ótti. Qazaqstandyq úsh birdei sportshy kúmis júldege ie boldy. Olar Ernur Súleimen (60 keli), Ádilet Ahmetǵali (70 keli), Aidos Ǵalymov (90 keli).
• «Alaý» muz saraiynda qyrǵyz halqynyń ulttyq oiyny ordodan Qazaqstan quramasy finalǵa shyqty. Aqtyq báseke 13 qyrkúiek kúni ótedi.
• «Dýman» qonaq úi jáne sport kesheninde Batys Afrika halyqtarynyń ziiatkerlik oĭyny ovariden ótken jarysta Ásel Dalieva altyn júlde alsa, Ańsaǵan Qojanásip qola júlde ielendi.
