AQSh-ta jergilikti turǵyndar naǵyz ǵajaiyp dep atap ketken oqiǵa boldy. 82 jastaǵy áiel sátsiz qulaǵannan keiin óz úiindegi jýynatyn bólmede toǵyz kúnge jýyq qamalyp qalǵan. Soǵan qaramastan, ol aman qaldy, dep habarlaidy ult.kz New York Post basylymyna silteme jasap.
Oqiǵa Klaid qalasynda bolǵan. Djoan Rivet 2023 jyly kúieýi qaitys bolǵannan keiin jalǵyz ózi turǵan. Bir kúni ol uiyqtaýǵa daiyndalyp jatqan kezde jýynatyn bólmede taiyp ketken. Zeinetker shalqasynan vannaǵa qulap, sonymen birge perde karnizin jáne aýyr perdeni julyp ketken. Omyrtqasy qatty aýyrǵandyqtan, ol ornynan tura almaǵan jáne vannanyń biik jieginen ózdiginen shyǵa almaǵan.
Osy ýaqyt ishinde áiel kómekke shaqyrǵanymen, ony eshkim estimegen. Onyń janyndaǵy jalǵyz tirshilik iesi Fibi esimdi mysyq bolǵan. Ol jýynatyn bólmeniń syrtynda aianyshty túrde miiaýlaǵan.
Tamaq ishpei 9 kún jatty
Qamalyp qalǵan áiel birtindep álsirep, birneshe ret esinen tanyp qalǵan. Onyń aman qalýyna qarapaiym sý kómektesken. Qatty aýyrǵanyna qaramastan, áiel aiaǵymen kranǵa áreń jetip, ony ashqan. Osylaisha betine aqqan sýdy iship otyrǵan.
Qutqarylýyna týystary sebep boldy
Zeinetkerdiń Djordjiia shtatynda turatyn aǵasy Bill Lesko onyń jaǵdaiyna alańdaǵan. Ol birneshe kún boiy ápkesine habarlasýǵa tyrysqanymen, qońyraýlaryna jaýap bolmaǵan. Osydan keiin er adam kórshilerinen onyń úiin tekserýdi suraǵan. Bul da nátije bermegen soń, Bill Heivýd okrýgi sherifiniń keńsesine júgingen.
Oqiǵa ornyna kelgen politsiia qyzmetkerleri Djoan Rivetti jýynatyn bólmeden jartylai es-tússiz kúide tapqan.
Dárigerler onyń qatty sýsyzdanǵanyn, álsiregenin jáne bir qalypta uzaq ýaqyt jatýyna bailanysty denesinde kóptegen oiylý jaralary paida bolǵanyn anyqtaǵan. Bir qyzyǵy, toǵyz kún boiy tamaq pen sýsyz qalǵan Fibi esimdi mysyq ta aman qalǵan.
Em qabyldap, ońaltýdan ótkennen keiin zeinetker aǵasynyń úiine kóshýdi uiǵarǵan.
"Men kóp ýaqytymdy duǵa etýmen ótkizdim. Vannadan qalai shyǵýǵa bolatynyn túsinýge tyrystym jáne áli tiri bolǵanym úshin Jaratqanǵa shúkirshilik ettim. Eń jaman nárseler týraly oilamaýǵa tyrystym, óitkeni bir ret sol oilarǵa berilip ketseń, odan keiin qalai shyǵatynyńdy bilmeisiń", – dedi amerikalyq áiel basynan ótken oqiǵamen bólisip.
