Qazaqstan musylmandary dini basqarmasy 81,3 myń otbasyǵa qurbandyqqa shalynǵan maldyń etin úlestirdi, dep habarlaidy muftiyat.kz.
Qazaqstan musylmandary dini basqarmasy qoǵam aldyndaǵy qaiyrymdylyq qyzmetin jandandyra túsý maqsatynda jáne elimizdegi epidemiologiialyq jaǵdai kezinde musylmandyq mindetti kedergisiz atqarýǵa ońtaily usynys retinde qurban2020.kz jobasyn iske qosty.
Sanitarlyq talaptardy saqtai otyryp, osy jobany joǵary deńgeide júzege asyrý úshin ár aimaqta jumys toby quryldy. QMDB ókildigi janynan qurylǵan jumys toby táýlik boiy qyzmet etti. Osy jobaǵa din qyzmetkerlerimen qosqanda 3 924 erikti, 872 kólik jumyldyryldy.
Elimizde belgilengen 35 statsionarlyq qasaphanada 394 qasapshy jumys istedi. Al ár óńirdegi ortalyqtandyrylǵan jumys tobynda 447 adam qyzmet etti. Respýblika boiynsha 25 sall-ortalyq qurban2020 jobasy boiynsha tiisti keńes pen aqparat berýmen ainalysty.
Igi iske úles qosqan eriktiler men meshit jamaǵatynyń belsendi jumysynyń nátijesinde 81 301 muqtaj otbasyǵa qurbandyq eti jetikizildi. Jer-jerdegi qarttar, jetimder, balalar úileri men aýrýhanalarda da qaiyrymdylyq sharalary ótkizildi.
Aita ketsek, QMDB-nyń aimaqtaǵy ókilderi aittyń birinshi kúninde (31 shilde) kómekke zárý 30 715 otbasyǵa qurbandyq etin úlestirdi. Al aittyń ekinshi kúninde (1 tamyz) 27 741 januia merekelik qýanyshqa bólendi.
Qurban aittyń úshinshi kúninde (2 tamyz) 22 845 otbasyǵa et taratyldy. Jalpy alǵanda, iaǵni barlyq oblysty qamtyǵanda Qurban aittyń úsh kúninde 81 301 januiaǵa et jetkizildi.
