«Astana Opera» teatrynyń ártisi Mariko Kitamýra balerina mansabyn aiaqtady. Tokionyń týmasy otany Japoniiaǵa qaityp oralmaq. Óz suhbatynda bishi Qazaqstandaǵy ómiri týraly áserlerimen bólisip, qazaq baletiniń ereksheligi týraly aitty, sonymen qatar elimizge, týǵan teatryna kórermen retinde kelýge ýáde berdi, dep habarlaidy «Astana Opera» teatrynyń baspasóz qyzmeti.
- Siz on jylǵa jýyq kásibi qyzmetińizdi qazaq baletine arnadyńyz, elordalyq teatrǵa qalai keldińiz, elimizben tanystyǵyńyz qalai bastaldy?
- Bes jyldai máskeýlik teatrda jumys istedim, 2013 jyly Qazaqstanda Ortalyq Aziiadaǵy eń iri teatrlardyń biri ashylady degendi estip, óz baǵym men kúshimdi synaýǵa bel býdym. Óte qatań konkýrstyq irikteý boldy, ártisterdi túrli elden kelgen qazylar músheleri baǵalady, baǵyma orai, shyǵarmashylyq baiqaýdan súrinbei ótip, «Astana Opera» trýppasyna qabyldandym.
- Qazaqstan birden unady ma?
- Iá, álbette. Mundaǵy adamdar óte ashyq jarqyn, meiirimdi, niettes. Balet trýppasymen tanysqan kezde de ózime degen osyndai qarym-qatynasty sezindim, meni qoldap, kómektesip, árdaiym aqyl-keńesin berýden aianbaityn kóptegen dosym bar.
- Olai bolsa, nelikten Japoniiaǵa oralý týraly sheshim qabyldadyńyz?
- Túsinesizder me, balet ártisiniń ǵumyry qysqa, meniń jasym 36-da, kásibi mansapty toqtatý sáti keldi, sondyqtan Tokioǵa, saǵyndyrǵan otbasyma oralamyn dep sheshtim. Qyzmet salamdy aýystyrýdy josparlaýdamyn, degenmen balet máńgi-baqi menimen birge, endi tek ózim úshin ainalysamyn. «Astana Opera» teatrynda jumys jasaǵan jyldarym ishinde sahna tórinde jarqyn jeke partiialardy, tórttikterdi, ekilikterdi jasadym, teatrdyń repertýaryndaǵy túgel derlik spektaklderde biledim. «Shopeniana» romantikalyq baletindegi Preliýd airyqsha esimde, ol óte kúrdeli nómir. Osyndai mándi de mazmundy mansabym úshin, ásirese, «Jizel», «Don Kihot» baletterindegi birneshe premeralarym oryn alǵan ózimniń sońǵy teatr maýsymym úshin balet trýppasynyń kórkemdik jetekshisi, Reseidiń Halyq ártisi Altynai Asylmuratovaǵa alǵysym sheksiz, men árdaiym onyń qoldaýyn, maǵan degen jyly lebizin sezindim.
- Suhbattaryńyzdyń birinde Siz ata-anańyz árqashan kórermen úshin bileýiń kerek dep úiretkenin aitqansyz. «Astana Opera» teatry ashylǵaly Sizdiń óz kórermenderińiz paida bolǵanyn jaqsy bilemiz.
- Teatrymyzǵa igi, jany jaisań jaqsy kórermender keledi, olar únemi ártisterdi qoshemetterimen qoldap otyrady. Sózsiz, kez kelgen ártis zaldan keletin qýatpen jigerlenedi, aramyzda emotsiialarmen almasý júredi desek bolady. Men baletti qatty jaqsy kóremin, sahnaǵa shyqqan kezde ózim úshin de bileimin, budan zor lázzat alamyn, sebebi árdaiym osyny armandaitynmyn.
- Qazaqstanda ótkizgen jyldaryńyz ishinde ózińiz úshin qandai jańa tustardy ashtyńyz?
- Mundaǵy adamdardyń jaidary ekenin joǵaryda aityp óttim. Osynda turyp kele jatqannan beri qazaqtyń dástúrli taǵamdaryna úirendim, óte dámdi et, ásirese, qazy til úiiredi. Bul eldiń salt-dástúri men mádenieti keremet. Kóp ýaqyt boiy Nur-Sultanda turǵandyqtan, qalanyń ásem sáýletin atap óte alamyn, ol álemdik astanalardan esh kem túspeidi. Demalys kúnderi dostarymyzben jap-jasyl saiabaqtar men gúl baqtarynda jii qydyratynbyz, munda bári de janǵa jaily, qolaily, bári de keremet oilastyrylǵan. Bir jaǵynan, qazaq mentalitetine, mádenietine sińisip kettim, osy elmen qoshtasý kóńilimde muńly sezim týdyrady. Arqamda jaýapkershilik júgi baryn sezinemin, sebebi mádeni ómir meniń esimimmen de bailanysty: «Astana Opera» teatrynyń ashylýyna qatystym, munda maǵan arnap tigilgen kostiýmder de bar. Zor alǵys sezimimen ketip baramyn, sebebi dál osy Qazaqstanda álemdik ataǵy bar qoiýshy horeograftarmen jumys isteý múmkindigi týdy. Ashylǵan sátinen bastap teatr aýqymdy is tyndyrdy, basqa trýppalarda men daiyn repertýardy bileitinmin, al munda balettiń tuńǵiyǵyna tereńirek boilaýǵa, spektakl jasalýynyń qyr-syryn úirenýge múmkindik berildi, osynyń arqasynda balettiń dúniege kelýi týraly pikirim túbegeili ózgerdi, bul orasan zor eńbek. Kóz aldymda «Astana Opera» teatry Qazaqstan mádenietiniń betke ustaryna ainaldy, osy tarihtyń bir bólshegi bolǵanym úshin ózimdi baqytty sezinemin. Endigi kezekte teatrǵa kórermen retinde oralý josparymda bar, al eger trýppa gastroldik saparmen Japoniiaǵa at basyn bursa, mindetti túrde syilyqtarymmen baramyn.
«Astana Opera» teatrynyń direktsiiasy, balet trýppasynyń kórkemdik jetekshisi Altynai Asylmuratova balet ártisi Mariko Kitamýraǵa Úlken zal sahnasynda somdaǵan beineler galereiasy úshin, qajyrly da qairatty eńbegi men jumysqa degen minsiz qarym-qatynasy úshin sheksiz alǵysyn bildirdi. Basshylyq ártistiń jańa bastamalaryna sáttilik, myqty densaýlyq tilep, teatrdyń esigi Mariko Kitamýra úshin árdaiym aiqara ashyq ekenin aitty.
