Foto: forestry.gov.cn
Elimizdiń 7 óńirinde egistikti kiikterden qorǵaý úshin 557 adam men 182 tehnika jumyldyryldy. Bul týraly Ekologiia jáne tabiǵi resýrstar ministrliginen málim etti.
- 2025 jylǵy eseptik derekter boiynsha Qazaqstan aýmaǵynda kiikterdiń jalpy sany 3 mln 978 myń basqa jetip, tarihi eń joǵarǵy kórsetkishten (1974 jyly 1,2 mln bas) aitarlyqtai asyp tústi. Kiikter sanynyń artýyna bailanysty fermerlerdiń egistik alqaptary taptalynady. Bul da olardyń ónimniń bir bóligin joǵaltýyna ákeledi. Egistik jerlerdi kiikterdiń taptaýynan qorǵaý jáne fermerlerge qoldaý kórsetý maqsatynda 7 óńirde oblys ákimderiniń orynbasarlary basqaratyn jedel shtabtar quryldy. Aýyl sharýashylyǵy jerlerine inspektorlyq quram tarapynan patrýldik baqylaý uiymdastyryldy. Sondai-aq vahtalyq ádispen kezekshilik engizildi, - dedi vedomstvodan agenttiktiń saýalyna orai.
Ministrlik málimetinshe, kezekshilikke barlyǵy 557 adam men 182 tehnika jumyldyrylǵan. Onyń ishinde Ekologiia jáne tabiǵi resýrstar ministrliginen 431 adam men 127 tehnika, jergilikti atqarýshy organdardan 126 adam men 55 tehnika bar.
- Kezekshi toptar aýyl sharýashylyǵy jerlerinde táýlik boiy qyzmet atqaryp, kiikterden egistik jerlerdi qorǵaýmen ainalysady. Qazirgi tańda Ekologiia jáne tabiǵi resýrstar ministrliginiń tapsyrysymen Zoologiia institýty kiik sanyn retteýdiń ǵylymi negizdemesin ázirledi. Atalǵan negizdeme boiynsha Úkimet kiik popýliatsiiasyn retteý týraly sheshim qabyldaidy. Sonymen qatar múddeli memlekettik jáne jergilikti atqarýshy organdarmen birlese otyryp, kiik sanyna baqylaý júrgizý baǵytynda jumystar júrgizilýde, - dedi Ekologiia ministrligi.
Buǵan deiin Ekologiia ministri Erlan Nysanbaev kiik sanyn retteýge, aýlaýǵa qatysty ǵalymdardyń biologiialyq negizdemesi daiyn bolǵanyn aitqan edi.
- Zoologiia institýtynyń resmi biologiialyq, ǵylymi negizdemesin aldyq. Kiik sanynyń 20 paiyzy retteýge jatady, - degen edi ol.
