Búgin Bas prokýratýrada ótken brifing - 2019 jylǵy jumys qorytyndylary men prokýratýra organdarynyń negizgi fýnktsiialaryna, joǵary qadaǵalaýdyń mańyzdylyǵyna arnaldy, dep habarlaidy "Ult aqparat" vedomstvonyń baspasóz qyzmetine silteme jasap.
Resmi ókil Oksana Peters málim etkendei, ótken jyly anyqtalǵan zań buzýshylyqtar boiynsha ártúrli jaýaptylyqqa 19 myń adam tartyldy. Memleketke 32 mlrd. teńge qaitarylǵan. Prokýrorlardyń qoldaýhattary men narazylyqtary boiynsha azamattyq jáne ákimshilik ister boiynsha 1025 sot aktileriniń kúshi joiyldy jáne ózgertildi.
Brifingte múgedekterdiń, onyń ishinde múmkindigi shekteýli balalardyń quqyqtary qalai saqtalatyny aityldy.
“7 myń múgedekten 90 mln. teńgege zańsyz salyq ustap qalý faktileri oryn alǵan. Uzaq ýaqyttan beri múgedek balalardy oqytatyn mektepterdiń 30 myńnan astam muǵalimine - zań boiynsha tiesili 40% paiyz mólsherinde ústemeaqy tólenbei kelgen. Bizdiń aralasýymyzdan keiin qazir bul tólemder iske asyrylýda”, - dedi Oksana Peters.
Bas Prokýrordyń Nusqaýy boiynsha balalarǵa qarsy qylmystar men zorlaý qylmystaryn tergep-tekserýge jáne ashýǵa mamandanǵan 96 jedel tergeý toby quryldy. Olardyń quramynda tájiribeli tergeýshi jáne prokýror áielder bar. Mundai isterdi tergep-tekserý ádistemesi ázirlengen. Nátijesinde jynystyq qylmystardy tergep-tekserý tiimdiligi 42% ósti.
Qazaqstandyq jáne sheteldik jumyskerler arasynda eńbekaqy tóleýdegi tepe-teńsizdiktiń 500-ge jýyq faktisi anyqtalǵan. Barlyq zań buzýshylyqtar boiynsha tiisti sharalar qabyldanǵan.
Ótken jyly prokýrorlar qyzmettik úi-jailardan 752 adamdy bosatty. 295 adamdy negizsiz qýdalaýdy toqtatqan. Tergep-tekserýdi toqtatý jáne merzimderin úzý týraly 16 myńnan astam qaýlynyń kúshi joiylǵan.
Prokýrorlardyń sharalary boiynsha bir jarym myńdai azamatqa qatysty úkimder qaita qaraldy.
Bul rette 572 sottalǵan adamnyń jaǵdaiy jaqsardy, iaǵni olardyń jazasy men aiyptaý kólemi tómendetildi. Bas prokýratýranyń bastamasymen 41 adam aqtalǵan.
