Qazaqstan ulttyq quramasy Dúniejúzilik kóshpendiler oiyndarynyń úshinshi jarys kúnin 7 altyn, 7 kúmis, 9 qola medalmen aiaqtady, dep habarlaidy "Ult Aqparat" QR Týrizm jáne sport ministrliginiń «Ulttyq jáne at sporty túrleri ortalyǵynyń» baspasóz qyzmetine silteme jasap.
«Qazanat» ippodromy mańyndaǵy etnoaýylda ótken Jamby atý sportynyń Túrki stilinen altyn júldeni Eralhan Aikóz, al qola júldeni Aitbek Sarybai jeńip aldy. Kúmis júldeni túrkiialyq Kerem Igit enshiledi. Jarystyń ekinshi kúninde ulttyq quramanyń úsh birdei sportshysy Aziia stilinen júldeli oryndarǵa ie bolǵan edi.
Aýdaryspaqtan Syrym Izbasarov (100 keli) mońǵoliialyq sportshy Erbolat Jeńisbekti jeńip, altyn júlde aldy. 100 keliden joǵary salmaqta Birjan Qosaliev Qyrǵyzstan sportshysy Kýmýshbek Qydyrálievten basym túsip, altyn júldege ie boldy. Al 90 keli salmaq dárejesinde Esimhan Rahmatillá kúmis júlde enshileli. Ol Qyrǵyzstan sportshysy Islam Berdibekýýlynan jeńildi. Ulttyq qurama sportshylary aýdaryspaqtan jalpy esepte bes altyn, bir kúmis enshiledi.
«Arǵymaq» at-sport kesheninde dástúrli sadaq atýdan «Qalqan» nysanasynan ótken básekede Erbol Tápenov kúmis júldege, al Qasymhan Qanat qola júldege ie boldy. Bul – Qasymhannyń Kóshpendiler oiyndaryndaǵy ekinshi qola medali. Ekinshi jarys kúninde «Pýta» nysanasy boiynsha Jánibek Qulmyrzaev altyn, Aikórkem Batihan qola júlde alǵan bolatyn.
Jaqsylyq Úshkempirov atyndaǵy Jekpe-jek saraiynda qazaq kúresinen erler men áielder árqaisy tórt salmaq dárejesinde synǵa tústi. Qazaqstandyq balýandar ekinshi jarys kúni 4 altyn, 1 kúmis, 2 qola júlde ielendi. Áielder arasynda Zarina Saripova (65 keli) men Roza Nysantaiqyzy (70 keli) altyn júlde aldy. Zamzagýl Faizollanova (77 keli) kúmis júldege, Albina Bahieva (+77 keli) qola júlde aldy. Erler arasynda Ersultan Muzapparov (100 keli) pen Nurdáýlet Jarylǵapov (+100 keli) altyn júlde aldy. Erasyl Janataev (90 keli) qola júlde enshiledi. Qazaqstanyq balýandar qazaq kúresinen barlyǵy 15 medal aldy: 12 altyn, 1 kúmis, 2 qola. Aita ketsek, jarystyń birinshi kúni boz kilemde kúresken 8 qazaqstandyq sportshynyń barlyǵy da jeńistiń biik tuǵyryna kóterilgen bolatyn.
«Alaý» muz aidyny saraiynda ótken kýrashtan ekinshi jarys kúninde 7 balýan júlde aldy. Erler arasynda Ernur Súleimenov (60 keli), Aibek Qazaqbaev (66 keli), Nurdin Shaimerden (73 keli), áielder arasynda Tolǵanai Abeýova (57 keli) kúmis júldege ie boldy. Marat Nigmatýllaev (60 keli) pen Ádilet Ahmetǵali (73 keli), áielder arasynda Altynai Nurhanova (57 keli) qola júldege ie boldy. Osylaisha, ulttyq qurama kýrashty 13 júldemen (1 altyn, 6 kúmis 6 qola) qorytyndylady.
Fotolar:WNG2024 telegram
