QR Ulttyq banki «7-20-25. Árbir otbasyna baspana alýdyń jańa múmkindikterin berý» ipotekalyq turǵyn úi kreditteý baǵdarlamasyn bekitti, dep habarlaidy QazAqparat tilshisi.
«Baǵdarlama aiasynda qatysýshy bankterge qatysty ólshemsharttar aiqyndalatyn bolady. Qatysýshy bankterdiń tizbesi olar «Baspana» ipotekalyq uiymy» AQ-men tiisti sharttar jasasqan soń Qazaqstan Respýblikasy Ulttyq bankiniń resmi internet-resýrsynda jariialanady. Baǵdarlamanyń talaptaryna sáikes qatysýshy bankterdiń qaryzdar berý jáne qyzmet kórsetý úshin qaryz alýshylardan komissiia alýǵa quqyǵy joq»,- delingen Ulttyq bank taratqan aqparatta.
Sonymen qatar qatysýshy bankterdiń qaryzdardy berý rásimderiniń bastalǵany týraly aqparat Qazaqstan Ulttyq bankiniń saitynda da ornalastyryldy. «7-20-25» baǵdarlamasyn iske asyra bastaýdyń kútiletin merzimi - aǵymdaǵy jyldyń ekinshi jartysy.
«7-20-25» baǵdarlamanyń talaptaryn túsindirý úshin Qazaqstan Ulttyq bankiniń «QUB «Online» mobildik qosymshasynda 2018 jylǵy 19 maýsymnan bastap «7-20-25» jańa bólimi iske qosyldy, onda osy baǵdarlamaǵa qatysty qyzyǵýshylyq týdyratyn suraqtarǵa jedel jaýap alýǵa bolady.
Aita keterligi, baǵdarlama Memleket basshysynyń 2018 jylǵy 5 naýryzdaǵy halyqqa arnalǵan «Prezidenttiń bes áleýmettik bastamasy» úndeýinde aitylǵan birinshi áleýmettik bastamany iske asyrý aiasynda ázirlendi. Baǵdarlamaǵa Qazaqstan Respýblikasynyń eńbek jáne (nemese) kásipkerlik qyzmetten alatyn tabysy bar, sondai-aq menshik quqyǵynda turǵyn úii joq kez kelgen azamaty qatysa alady.
Elimizdiń kez kelgen óńirinde bastapqy naryqta turǵyn úi satyp alý úshin mynadai qun sheginde ipotekalyq turǵyn úi qaryzyn alý múmkindigi qaralady: 25 mln teńge - Astana, Almaty, Aqtaý jáne Atyraý qalalarynda; 15 mln teńge - basqa óńirlerde.
Baǵdarlamanyń operatory Qazaqstan Respýblikasy Ulttyq bankiniń enshiles uiymy «Baspana» ipotekalyq uiymy» AQ. Operator obligatsiialardy shyǵarý jáne ornalastyrý esebinen qarjylandyrýdyń naryqtyq tetikterin paidalana otyryp Qazaqstan qor birjasyna (KASE) keminde 1 trln teńgeni tartady jáne túsken qarajatty baǵdarlamanyń talaptary boiynsha qatysýshy bankter bergen ipotekalyq turǵyn úi qaryzdaryn satyp alýǵa baǵyttaidy.
