Ulttyq ekonomika ministri Timýr Súleimenov «Nur Otan» partiiasynyń bastaýysh uiymdarynyń respýblikalyq forýmynda memlekettiń «7-20-25» baǵdarlamasy arqyly azamattarǵa ekinshi deńgeili úilerdi satyp alý múmkindigin berýdi ázirge kózdemeitinin aitty, dep habarlaidy Baq.kz agenttigi.
Forým barysynda ministrge zalda otyrǵandar bylai dep suraq qoidy: «7-20-25» baǵdarlamasy boiynsha ekinshi deńgeidegi turǵyn úidi paidalaný múmkindikteri qarastyrylyp jatyr ma? Otbasylyq tabysy 100 myń teńge bolatyn, biraq eki-úsh balasy bar adamdarǵa baǵdarlama boiynsha baspana alý óte qiyn. Kirisi tómen otbasylarǵa baǵdarlama boiynsha baspana alý máselesi qalai sheshiledi».
Óz kezeginde, Timýr Súleimenov baǵdarlama boiynsha alǵashqy jarnany sýbsidiialaýǵa jergilikti biýdjet jaýap beretinin aitty.
«Ákimdiktermen birge atqarǵan jumysymyzdan kóringendei, jergilikti biýdjette aqsha bar. Baǵdarlama ózińiz biletindei endi jandanyp keledi. Ákimdikter qajetti qarajattyń jetpei jatyr degen másele kóterip otyrǵan joq. Al jańa úilerden bólek, qoldanystaǵy úidi baǵdarlama boiynsha alý múmkindigin berý týraly suraq birneshe ret kóterildi. Osy baǵdarlama arqyly birinshiden azamattardy baspanamen qamtý, ekinshiden qurylys qarqynyn údetý kózdelgen. Memleket berip jatqan qarajat barynsha tiimdi jumsalsa degen maqsat qoiyp otyrmyz. Sondyqtan, adamdarǵa sýbsidiia bergen kezde olar úi alyp, jańa úiler boi kóterip jatsa, jumys oryndary ashylady, salyq tólenedi. Baǵdarlamanyń júzege asyrylyp jatqanyna bir jyl tolmai jatyp, ekinshi deńgeili úilerdi satyp alý múmkindigin qarastyryp jatqan joqpyz. Bulai jasasaq jańa úilerdi turǵyzý mindetin oryndai almai qalýymyz múmkin», - dedi Súleimenov.
Ministr kirisi tómen otbasylar úshin alǵashqy jarnany tómendetý týraly suraqqa jaýap berdi. Ol baǵdarlamanyń áleýmettik turǵyn úi baǵdarlamasy emes ekenin eskertti.
«Ratsionaldy, pragmatikalyq minezdemege ie, jumysyn istep, zeinetaqy aýdarymyn jasap otyrǵan adam ózi úshin depozit nemese Turǵyn úi qurylys jinaq banki arqyly aqshasyn jinap, baspana alý quqyǵyna ie bolýy tiis. «7-20-25» baǵdarlamasynan bólek, elimizde áleýmetti turǵyn úi baǵdarlamasy bar. Memleket ondai toptaǵy adamdardy shetke ysyryp tastady deýge bolmaidy. Ol baǵdarlamalardyń da aýqymy keńeie beredi. Al «7-20-25» baǵdarlamasy belgili bir jinaǵy bar adamdarǵa arnalǵan», - dedi Ulttyq ekonomika ministri.
