"7-20-25" baǵdarlamasy iske qosylǵannan beri ótinishterdiń 23 protsenti bankter tarapynan maquldanbaǵan. Bul týraly búgin "Baspana" ipotekalyq uiymynyń basshysy Qairat Altynbekov málimdedi, dep habarlaidy Sputnik Qazaqstan tilshisi.
Altynbekovtiń aitýynsha, "7-20-25" baǵdarlamasy iske qosylǵan ýaqyttan beri barlyq berilgen ótinishtiń 23 protsenti nemese 2457 ótinim bankter tarapynan maquldanbady.
"Onyń negizgi sebepteri – nesie tarihynyń buzylýy men resmi tabystyń bolmaýy", - dedi ol úkimet otyrysynda.
Ol nesie alýshylardyń negizgi bóligin 25 pen 35 jas aralyǵyndaǵy azamattar quraitynyn atap ótti. Ipotekalyq nesieniń ortasha somasy Astana, Almaty, Aqtaý jáne Atyraý qalalarynda – 13 million teńge, qalǵan óńirlerde – 9 million teńge. Kredittiń ortasha merzimi – 20 jyl.
"Bul qazirgi tańda baǵdarlama aiasynda aimaqtarda qoiylǵan shekti baǵalardyń azamattarǵa baspana alýǵa keń kólemde múmkindik berip otyrǵanyn kórsetedi. Jáne naryqta páter baǵasynyń ósýine tejeý qoiyp otyr", - dedi Altynbekov.
Aitýynsha, qazir "7-20-25" baǵdarlamasy 8 bank arqyly júzege asyrylýda. 14 naýryzdaǵy málimet boiynsha 120 milliard teńgege 10 500 ótinim berilgen, onyń ishinde bankter 72 milliard teńgege 6165 ótinimdi maquldaǵan.
Jyl basynan beri berilgen nesie portfeli 49 protsentke ulǵaiyp, 19 milliard teńgege 1639 kredit berildi.
