Premer-Ministrdiń tóraǵalyǵymen ótken Úkimet otyrysynda Ulttyq bank tóraǵasy E. Dosaev 2019 jylǵy qańtar-qazan ailaryndaǵy aqsha-nesie saiasatynyń iske asyrylýy týraly baiandady, dep habarlaidy "Ult aqparat".
E. Dosaev atap ótkendei, jyldyq infliatsiia bizdiń kútýimizge sáikes qalyptasýda jáne qazannyń qorytyndysy boiynsha 5,5% boldy.
Aqyly qyzmetterge baǵa men tarifterdiń ósýi tarihi eń tómen deńgeide qalýda – jyldyq kórsetýde 0,8%. Retteletin qyzmetterge tarifter qazanda jyldyq kórsetýde 7,7%-ke tómendedi.
Jyl sońyna deiin infliatsiia deńgeii 5,7-5,8%, iaǵni 4-6% targetteletin dálizde baǵalanady.
«Osy faktorlardy eskere otyryp, Ulttyq Bank 28 qazanda bazalyq stavkany 9,25% deńgeide jáne +/- 1 paiyzdyq tarmaq dálizde saqtady. Aqsha-kredit saiasaty sharalary sheńberinde Ulttyq Bank ainalystaǵy nottar kólemin mamyr-qazan aralyǵynda 30,1%-ǵa 4,3 trln teńgeden 3,0 trln teńgege deiin qysqartty. Nátijesinde bankter artyq ótimdilikti kreditteýge jáne ekonomikany basqa qarjylandyrýǵa qaita jiberdi», — dedi Ulttyq bank tóraǵasy.
Aldyn ala qorytyndy boiynsha, 9 aida tólem balansy aǵymdaǵy shotynyń defitsiti ósip, 2018 jylǵy 9 aidaǵy $1,8 mlrd-pen salystyrǵanda $4,7 mlrd qurady.
Tikelei sheteldik investitsiialardyń taza ákelinýi ótken jylǵy kórsetkish deńgeiinde qalyptasyp, $5,1 mlrd dollar boldy. Ol beirezidentterdiń kiristerin qaita investitsiialaýmen jáne rezidentterdiń sheteldik enshiles uiymdarynan kapitalyn qaitarýymen qamtamasyz etildi.
Portfeldik investitsiialar boiynsha kapitaldyń taza áketilýi 13,0%-ǵa azaiyp, 2019 jylǵy 9 aida $2,6 mlrd boldy. Kapitaldyń ákelinýi Qarjy ministrliginiń 3-toqsanda 1,15 mlrd eýroǵa eýroobligatsiialar shyǵarýmen jáne «Qazatomónerkásip» UAK» AQ-tyń jahandyq depozitarlyq qolhattaryn satýmen qamtamasyz etildi.
E. Dosaevtyń aitýynsha, nesielendirýdiń ósýi artýda.
«Jyl basynan beri jalpy kredittik portfel qyrkúiektiń sońynda 2,3%-ke 13,4 trln teńgege deiin ósti. 1-toqsanda bankterdi qalypqa keltirý nátijesinde jumys istemeitin qaryzdar esepten shyǵarylǵan soń sáýir-qyrkúiekte kreditteýdiń ósýi 7,4% nemese 921,8 mlrd teńge boldy», - dedi E. Dosaev.
Zańdy tulǵalarǵa kreditter kólemi 1,7%-ǵa nemese 121,7 mlrd teńgege ósti. Jeke tulǵalardyń kredittik portfeli 14,7%-ǵa nemese 800 mlrd teńgege ósti. Uzaq merzimdi kreditter qyrkúiek qorytyndysy boiynsha 11,4 trln teńge, qysqa merzimdi kreditter 2 trln teńge boldy.
«7-20-25» baǵdarlamasyn iske asyrý sheńberinde 7 qarashadaǵy jaǵdai boiynsha 10 676 otbasy 122,8 mlrd teńge somaǵa qaryz aldy.
Ekonomikanyń basym salalaryn jeńildikpen kreditteý baǵdarlamasyn (600 mlrd teńge) iske asyrý jalǵasýda. 1 qarashadaǵy jaǵdai boiynsha bankterde 248,3 mlrd teńgege 393 joba qaralýda, 142,3 mlrd teńgege 224 joba maquldandy, 55,5 mlrd teńgege 147 qaryz berildi.
