24 shildede Qazaqstanda 6631 adamnyń analizinen koronavirýs anyqtaldy. Buǵan deiin bir kúnde osynsha kóp naýqas tirkelmegen. Eki kún buryn bir kúnde anyqtalǵan naýqastar alǵash ret 6 myńnan asqan bolatyn. Sodan beri bul kórsetkish úzdiksiz ósip jatyr.
Eki kún buryn 84 adam Covid-ten qaitys boldy: 74 adam – koronavirýstan, 10 adam koronavirýs pnevmoniiasynan qaitys bolǵan. Bul da - eń joǵary kórsetkish. Indet bastalǵaly beri bir kúnde osynsha kóp adam ólimi bolmaǵan.
Elde virýs kúsheidi. Resmi málimet boiynsha, maýsym aiymen salystyrǵanda shildeniń sońǵy eki aptasynda koronavirýs juqtyrǵandar 4,8 ese ósken. Barǵan saiyn aýrýhanalar da tolyp barady. Qazaqstan aýrýhanalaryndaǵy juqpaly aýrýlar bólimderiniń 51 paiyzy, jan saqtaý bólimderiniń 41 paiyzy bos emes. Qosymsha oryndar ázirlenip jatyr.
Indet ásirese, Nur-Sultan men Almaty qalalarynda, Qaraǵandy oblysynda órshigen. Ótken táýlikte Nur-Sultanda 1501 adamnan koronavirýs anyqtaldy. Almatyda – 1191, Qaraǵandy oblysynda 768 naýqas tirkelgen. Qalǵan oblystar men qalalarda bir táýlikte anyqtalǵan naýqastar 500-ge jetpeidi. Ótken táýlikte Shymkentte 499 adamnyń koronavirýs testi oń shyqty. 24 shildede eń tómen kórsetkish Jambyl oblysynda (102) tirkeldi.
Indet bastalǵaly beri 529 myńnan astam adamnyń koronavirýs testi oń shyqqan. Budan bólek, PTR testi teris nátije kórsetip, biraq aýrý belgileri koronavirýstykine uqsaityn pnevmoniia esebi bar. Úkimet bul esepti byltyr 1 tamyzda bastaǵan. Sodan beri pnevmoniianyń bul túrine 59 myńnan astam adam shaldyqqan. 23 shildede 212 adamǵa koronavirýs pnevmoniiasy diagnozy qoiyldy.
2020 jyldyń naýryz aiynan beri 5382 adam koronavirýstan qaitys boldy dep aitylady. Tamyz aiynan beri koronavirýs pnevmoniiasy 3605 adamnyń ólimine sebep bolǵan.
25 shildedegi aqparat boiynsha, Qazaqstanda 78 917 adam koronavirýs infektsiiasynan (76 891+ jáne 2026 KVI-) emdelip jatyr.
Olardyń ishinde 23 046 patsient statsionarda, 55 871 naýqas ambýlatoriialyq deńgeide em qabyldaýda.
KVI+, KVI- shaldyqqandardyń arasynda:
• 1438 adamnyń jaǵdaiy aýyr,
• 284 patsienttiń jaǵdaiy óte aýyr,
• 182 naýqas jasandy tynys alý apparatynda jatyr.
Qazaqstanda aqpan aiynan beri halyqqa koronavirýsqa qarsy vaktsina salynyp jatyr. Sodan beri 5 millionnan astam adam vaktsinanyń birinshi dozasyn alǵan. Ekpeniń tolyq dozasyn alǵandar 3 millionnan asty.
Elde reseilik "Spýtnik V", qazaqstandyq QazVac, qytailyq Hayat-Vax jáne CoronaVac ekpelerin salady.
Koronavirýs juqtyrǵandardyń ótken táýlik boiynsha tolyq deregi:
Nur-Sultan qalasy - 1501,
Almaty qalasy - 1191,
Shymkent qalasy - 499,
Aqmola oblysy - 194,
Aqtóbe oblysy - 229,
Almaty oblysy - 230,
Atyraý oblysy - 420,
Shyǵys Qazaqstan oblysy - 134,
Jambyl oblysy - 102,
Batys Qazaqstan oblysy - 271,
Qaraǵandy oblysy - 768,
Qostanai oblysy - 178,
Qyzylorda oblysy - 179,
Mańǵystaý oblysy - 245,
Pavlodar oblysy - 225,
Soltústik Qazaqstan oblysy - 141,
Túrkistan oblysy - 124.
