Elimizde egin jinaý jumystary 95 paiyzǵa jýyq oryndaldy. Bul týraly Úkimet otyrysynda QR Premer-Ministri Asqar Mamin aitty, dep habarlaidy QazAqparat.
«Álemdegi bidai jinaý boiynsha jaǵdai kúrdeli bolyp otyr. Ózderińizge málim, aýa raiynyń qolaisyz bolýy – astyq shyǵymynyń tómendeýine yqpal etti. Qazaqstanda dándi daqyldar men maily daqyldardy jalpy jinaýdy 18 mln tonnaǵa, sonyń ishinde dándi jáne dándi-burshaqty daqyldardy 16 mln tonnaǵa deiin jetkizý josparlanyp otyr», - dedi Úkimet basshysy.
Onyń atap ótýinshe, búgingi kúni egin jinaý jumystary 95 paiyzǵa jýyq oryndaldy.
«Biylǵy qurǵaqshylyqtyń saldarynan bidai kólemi azaisa da, elimizdegi bidaiǵa degen ishki qajettilik tolyq qamtamasyz etildi. 6-6,5 mln tonnaǵa jýyq bidaidy eksportqa shyǵarýǵa múmkindigimiz bar», - dedi Asqar Mamin.
