Bes jyl ishinde 600 myń gektar sýarmaly jerdi qalpyna keltirý jónindegi jumystar jalǵastyrylady. Bul týraly Úkimet otyrysynda kanaldar men sý qoimalaryn salýdy talqylaý kezinde QR Ekologiia, geologiia jáne tabiǵi resýrstar ministri Serikqali Brekeshev málim etti, dep habarlaidy QazAqparat.
«Memleket basshysy Qasym-Jomart Kemeluly Toqaevtyń tapsyrmasyna sáikes, biz 2030 jylǵa deiin sýarmaly jer kólemin 3 million gektarǵa deiin jetkizýimiz qajet. Sýarmaly eginshilik negizgi sý tutynýshy bolyp otyrǵanyn aita ketý kerek. Búgingi tańda sýarmaly jerlerdiń alańy 1,6 million gektardy qurady. Bes jyl ishinde 600 myń gektar sýarmaly jerdi qalpyna keltirý jónindegi jumystar jalǵastyrylady. Osylaisha, sýarmaly jerlerdiń alańy 2,2 million gektarǵa deiin jetkiziletin bolady», - dedi Brekeshev.
Onyń aitýynsha, budan ári 2025-2030 jyldar aralyǵynda 800 myń gektar sýarmaly jer ainalymǵa engiziletin bolady.
«Sýarmaly eginshiliktiń aǵymdaǵy jai-kúii týraly qysqasha baiandap óteiin. Sý tartýdyń barlyǵyn alatyn bolsaq 12,1 tekshe kilometr turaqty sýarýǵa keledi. Onyń ishinde 11,8 tekshe kilometr 4 ońtústik oblysqa tiesili: 1,25 mln gektar sýarmaly alańy bar Almaty, Jambyl, Túrkistan jáne Qyzylorda oblystary qamtylǵan. Iaǵni, bul sýarýǵa arnalǵan sý tartýdyń 97% paiyzy jáne el boiynsha barlyq sýarmaly alańnyń 78% paiyzy. Bul rette, osy jylǵy 1 qańtardaǵy jaǵdai boiynsha sý únemdeý tehnologiialarymen qamtylǵan alań respýblika boiynsha 248 myń gektardy qurady. Onyń ishinde ońtústik óńirde 1,25 mln gektardyń tek 5,4 paiyzy nemese 67,7 myń gektary ǵana engizilgen», - dedi ministr.
